Bërnabiq i reagon Borrellit: Serbët në barrikada janë paqësorë
Nga OraNews Përditësimi i fundit 11 Dhjetor 2022, 17:12
Situata në veri të Kosovës është e tensionuar. Lidhur me zhvillimet e fundit kanë reaguar jo vetëm qeveritarë të Kosovës e Serbisë por dhe përfaqësues ndërkombëtar.
Përmes një reagimi në Twitter Kryediplomati i Bashkimit Evropian, Josep Borrell tha se BE-ja nuk do të tolerojë sulme të tilla dhe se barrikadat duhet të hiqen menjëherë, derisa ka kërkuar që të shmanget përshkallëzimi.
Kryeministrja e Serbisë, Ana Bërnabiq ka reaguar ndaj deklaratës së Borrell. Kryeministrja serbe deklaroi se kjo i duket interesante.
“Interesante, ata nuk janë aq të zëshëm për paligjshmërinë e arrestimit të serbëve, për shembull Dejan Pantiqit, i cili u arrestua dje pa asnjë provë, apo kur policia e Kosovës shkel marrëveshjen e Brukselit duke hyrë të armatosur në komunat me shumicë serbe në veri me pushkë/tyta të gjata”, shkroi Bërnabiq në rrjetet sociale.
“Ata njerëz në barrikada shprehin qartë protestën e tyre dhe e bëjnë në mënyrë paqësore”, pretendon qeveritarja serbe.
“E vetmja mënyrë me të cilën mund të dëgjohen, për fat të keq, është në barrikada”, thotë Bërnabiq.
