Sulmi ndaj drejtorit të OSHEE, zbardhet dëshmia: Më goditën me levë, ishin 3 persona
Nga Ora News Përditësimi i fundit 1 Dhjetor 2022, 09:05
Sulmi ndaj drejtorit të OSHEE në Lezhë, dyshohet se ka lidhje me aksionet ndaj debitorëve të energjisë elektrike në këtë rajon. Edmir Përndreca në dëshminë e parë ka thënë se nuk i njohu tre personat që e rrahën me levë hekuri
Drejtori i Njësisë së Operatorit të Shpërndarjes së Energjisë Elektrike në Lezhë, Edmir Përndreca thotë se nuk i njohu tre personat që e dhunuan.
Nga Spitali i Traumës ku u trajtua për plagët që mori nga goditjet me levë, 43 vjeçari ka theksuar se po udhëtonte me makinën e punës kur e sulmua.
Më ndoqën dhe më goditën makinën. Sa zbrita më goditën me leva. Ishin tre persona, por nuk arrita t’i identifikoj,” ka thënë ai.
Ngjarja u shënua mbrëmjen e së mërkurës në Lezhë-Shënkoll.
Dyshimet janë për një ngjarje të qëllimshme e që lidhet me detyrën e Edmir Përndrecës.
Sulmi vjen pas itensifikimit të kontrolleve të OSHEE, për vjedhje apo ndërprerje të energjisë elektrike ndaj abonteve debitor.
Autorët besohet se kanë ndjekur lëvizjet e drejtorit të OSHEE dhe më pas i bënë pritë, duke i përplasur mjetin dhe më pas e qëlluan me sende të forta.
Nga të dhënat hetimore, autorët ishin të paktën tre persona.
Policia e Lezhës ka sekuestruar pamjet e kamerave të sigurisë, në disa biznese përgjatë rrugës Lezhë –Shënkoll, me qëllim identifikimin dhe më pas arrestimin e dhunuesve të drejtorit të OSHEE.
Edmir Përndreca është emëruar drejtor i Njësisë së Operatorit të Shpërndarjes së Energjisë Elektrike në Lezhë, prej më shumë se 1 viti, ndërsa ka një karrierë të gjatë, të punës si inxhinier pranë këtij institucioni.
Shenim: *Ky është artikull ekskluziv i Ora News, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Ora News” bashkëngjitur me linkun e artikullit origjinal.
