Ricardo Gutiérrez: Qeverisë i volit që të ketë një ambjent të dobësuar gazetaresk, jemi këtu për ti treguar Europës
Nga OraNews Përditësimi i fundit 18 Nëntor 2022, 22:38
Ricardo Gutiérrez nga European Federation of Journalists rikthehet në Shqipëri pas tre vitesh dhe me shqetësim thotë se ka vetëm regres në lirinë e medias.
Për Ora News me gazetarin Isa Myzyraj ai ndau shqetësimin se situata ka përshkallëzuar për keq.
Gutiérrez: Jemi këtu për të shpjeguar gjetjet e misionit tonë për lirinë e medias në Shqipëri. Erdhëm dhe tre vjet më parë dhe nuk shohim asnjë progres. Nga këndvështrimi jonë situata ka përshkallëzuar për keq. Nuk shohim autoritetet publike të ndërmarrin veprime.
Është e mundshme që të marrësh masa ligjore për të ballafaquar dhe kundërshtuar këto fenomene por një gjë e tillë nuk është bërë nga qeveria. Ne jemi skeptikë dhe dyshues sa i përket dëshirës së qeverisë për të zgjidhur këto probleme dhe dyshojmë se i volit qeverisë që të ketë një ambjent të zbehtë dhe të dobësuar gazetaresk. Nuk shohim ndonjë përmirësim dhe nuk e shohim qeverinë që të ndërmarrë ndonjë veprim sa i përket përmirësimit të situatës.
Ai thotë se situata bëhet më komike pasi vetë kryeministri ua pranoi në takimin që patën me të të premten se nuk ka asnjë progres.
Gutiérrez: Është paksa për të qeshur se ai vetë e pranoi se nuk kishte ndonjë progres. Ndaj e pyetëm po sa i përket veprimeve të tua, nëse nuk ka progres, ka përgjegjësi nga autoritetet publike shqiptare, ka përgjegjësi nga qeveria dhe besoj se ka aksione që duhen ndërmarrë në këtë vend sa i përket përmirësimit të situatës. Do ishte e mundshme për Shqipërinë të merrte masa të forta për të kundërshtuar përqëndrimin e pronësisë së medias, përmirësimit të pavarësisë së gazetarëve duke përfshirë dhe pavarësinë e redaksive.
I kërkuam Ramës se çfarë ke bërë dhe pse je në këtë pozitë mosveprimi? I volit qeverisë të lejojë që gazetarët të punojnë në kushte të vështira sepse në kushte të vështira ata e luajnë me vështirësi rolin e tyre si rojtarë të demokracisë. Nuk jam fare dakord me qëndrimin e kryeministrit dhe zyrtarëve të tjerë. Është një mënyrë për të diskretituar gazetarët. Qeveria duhet të kuptojë rolin e gazetarisë, ne jemi ata që i pyesim dhe ata janë aty duke mbajtur përgjegjësi me veprimet e tyre. Nuk bie dakord fare me të. Bëjmë thirrje që qeveria të njohë rolin e gazetarisë në shoqëri.
Ai vlerëson se presioni ndërkombëtar është i rëndësishëm.
Gutiérrez: Ne duhet të vijojmë të bëjmë presion ndaj qeverisë. Për tu anëtarësuar në BE vendi duhet të bëjë progres në lirinë e medias, është nga kriteret e rëndësishme. Jam këtu për ti thënë Europës se çfarë unë kam parë, për të raportuar veprimet e qeverisë. Nëse Shqipëria do të hyjë në BE duhet të ndërmarrë veprime. Deri tani nuk shoh asnjë veprim, përkundrazi propagandë nga qeveria dhe kapjes së mediave nga disa oligarkë që e përdorin median për interesin e tyre.
