Dyshohet se e ka vënë me krim, i sekuestrohet apartamenti 270 mijë euro në Tiranë lushnjarit
Nga OraNews Përditësimi i fundit 20 Tetor 2022, 16:29
Sekuestrohet një apartament me vlerë 270 000 euro, i dyshuar i përfituar nga veprimtari kriminale në fushën e narkotikëve, të kryera nga 32-vjeçari Marsel Korreshi.
Policia e Fierit ka ekzekutuar vendimin e Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së 32-vjeçarit, banues në Lushnjë.
Sipas policisë, atij ju sekuestrua një pasurie e paluajtshme (apartament në Tiranë), me vlerë 270 000 euro.
“Nga specialistët e seksionit për Hetimin e Krimeve Ekonomiko-Financiare të Drejtorisë Vendore të Policisë Fier, në bashkëpunim me Prokurorinë pranë Gjykatës së Rrethit Gjyqësor Lushnjë, u bë ekzekutimi i vendimit të Gjykatës së Rrethit Gjyqësor Lushnjë, i datës 03.10.2022, për vendosjen e sekuestros preventive ndaj pasurisë së shtetasit M. K., 32 vjeç, banues në Lushnjë, i dënuar më parë, për veprën penale "Prodhimi dhe shitja e lëndëve narkotike". Nga veprimet hetimore rezulton se pasuria e 32-vjeçarit ka si burim veprimtari kriminale.” – njofton policia.
Vijojnë hetimet dhe verifikimet për evidentimin e pasurive të tjera që mund të jenë në emër të këtij shtetasi dhe të personave të lidhur me të.
