E kapën kamerat/ I akuzuar për tre vjedhje, arrestohet 37 vjeçari kosovar në Sarandë
Nga OraNews Përditësimi i fundit 7 Tetor 2022, 08:45
Një 37 vjeçar nga Kosova është arrestuar nga policia e Sarandës pasi dyshohet për tre vjedhje të ndpdhura në lagjen nr. 1.
Me finalizimin e operacionit policor të koduar "Same", u arrestua Ardian Gashi., 37 vjeç, banues në Prishtinë, Kosovë, për të cilin Prokuroria ka nxjerrë urdhër ndalimi, për veprën penale "Vjedhja".
"Shtetasi A. G. dyshohet të jetë autor i disa vjedhjeve, në lagjen nr. 1 të qytetit të Sarandës, konkretisht:
- Më datë 26.04.2022, dyshohet se ka vjedhur motorin e një mjeti lundrues të ankoruar, në pronësi të shtetasit T. M.;
- Më datë 19.09.2022, dyshohet se ka vjedhur pajisje elektronike, në një subjekt tregtar;
- Më datë 04.10.2022, dyshohet se ka vjedhur disa produkte, në një subjekt tregtar," njoftoi policia.
Gjatë kontrollit të automjetit që ky shtetas drejtonte në momentin e ndalimit, shërbimet e Policisë gjetën dhe sekuestruan 2 armë të ftohta (thika).
Vijon puna për dokumentimin e plotë me prova ligjore, të vjedhjeve të tjera që mund të jenë kryer nga ky shtetas.
Materialet i kaluan Prokurorisë, për veprime të mëtejshme procedurale.
