Berisha nxjerr "mashtrimin" e Ramës nga sirtarët e Kryeministrisë: Do rrisë me 40% pagat e pedagogëve, por vetëm 10% do japë qeveria
Nga OraNews Përditësimi i fundit 4 Tetor 2022, 16:33
Kreu i Partisë Demokratike Sali Berisha thotë se kryeministri Edi Rama po përgatit mashtrimin e radhës.
Me një vendim qeverie, që sipas tij, Kryeministri e mban në sirtar, beson se do mashtrojë pedagogët dhe studentët për kërkesat e tyre madje dhe t’i përçajë dhe nxisë ata kundër njëri-tjetrit.
Sipas vendimit kurth, thotë Berisha, pagat e pedagogëve do rriten 40%. Por nga këto vetëm 10% do rriten me paratë e buxhetit të shtetit dhe 30% nga të ardhurat e universiteteve përmes tarifave që mbledhin nga studentët.
De facto, sipas tij, jo vetëm nuk do të ketë rritje por as dhe indeksim.
Duke dënuar atë që ai e cilëson mashtrim të turpshëm të Edi Ramës, Berisha shpreh mbështetjen e plotë të Partisë Demokratike për kërkesat e sindikatave të Arsimit të Lartë dhe studentë teksa u bën thirrje qytetarëve të mbështesin protestën e pedagogëve dhe studentëve të universiteteve që zhvillohet nesër, ora 10.00 para Universitetit Politeknik.
Berisha: Një tallje cinike e Edi Ramës me pedagogët dhe studentët e universiteteve të vendit. Nga buxheti i shtetit premton rritje pagash më të ulëta se sa rritja e inflacionit dhe të gjithë rritjen tjetër të rrogave të pedagogëve ua ngarkon studentëve.
Të dashur miq, nën presionin e fuqishëm të Sindikatave të Arsimit të Lartë Edi Rama ka përgatitur mashtrimin cinik të radhës. Me një vendim qeverie që ai e mban në sirtar beson se do mashtrojë pedagogët dhe studentët për kërkesat e tyre madje dhe t’i përçajë dhe nxisë ata kundër njëri-tjetrit. Kështu sipas vendimit kurth pagat e pedagogëve do rriten 40%.
Por nga këto vetëm 10% do rriten me paratë e buxhetit të shtetit. De facto jo vetëm nuk do të ketë rritje por as dhe indeksim. Kjo sepse inflacioni real është rreth 12%. Por tallja dhe cinizmi i tij nuk ndalon me kaq.
Në vendimin e tij, Rama parashikon që pagat do rriten 30% vetëm nga tarifat e studentëve (të ardhurat e universiteteve). Me këtë akt të papërgjegjshëm ai fut duart e zeza në xhepat e studentëve dhe familjeve të tyre. Por nga ana tjetër duke qenë diskrecion e rektorateve vetëkuptohet që kjo rritje nuk do ndodhë mbasi rektorët të ardhurat do t’i përdorin sipas qejfit për destinacione të tjera dhe jo për pagat e pedagogëve.
Në vendimin e tij mashtrim, Rama nuk thotë asnjë fjalë për mbështetjen financiare ndaj studentëve, buxhetin për kërkimin shkencor as dhe problematikat e mëdha të universiteteve tona.
Dënoj me ashpërsinë më të madhe këtë mashtrim të turpshëm të Edi Ramës dhe shpreh mbështetjen e plotë të Partisë Demokratike për kërkesat e sindikatave të Arsimit të Lartë dhe studentë dhe kërkoj plotësimin e menjëhershëm të tyre.
Ju bëj thirrje qytetarëve të mbështesin protestën e pedagogëve dhe studentëve të universiteteve që zhvillohet nesër më datë 5 tetor ora 10.00 para Universitetit Politeknik.
