VIDEO/ Inter bën me “zemër” tifozët zikaltër, Brozovic shpëton Inzaghin nga turpi
Nga OraNews Përditësimi i fundit 10 Shtator 2022, 19:54
Disfata në derbi dhe ajo në Champions League pasohen nga një fitore për njerëz me zemër të fortë. Në të 89-ën, Marcelo Brozovic u dha fund vuajtjeve të tifozëve dhe skuadrës zikaltër me rrjetën e 24 personale me fanellën e Interit.
Pasim perfekt i Nicolo Barrellas për kroatin që përfitoi nga një devijim i lehtë duke mposhtur edhe Milinkovic Savic, një nga më të mirët e Torinos në fushën e lojës deri në atë moment.
Interi triumfon 1-0 ndaj skuadrës granata që edhe nëse do të kishte dalë me një fitore nga kjo sfidë, nuk do të kishte vjedhur asgjë por Handanovic ishte në ditën e tij më të mirë ashtu si edhe Milinkovic Savic në krahun tjetër.
Ndeshje me shumë ritëm në “San Siro” ku miqtë luajtën hapur duke vendosur në vështirësi serioze skuadrën e Inzaghit që duhet të gëzojë për pikët por jo për lojën e Interit.
Ndërkohë, pak orë më parë në Napoli, Raspadori konsolidoi pozitat e skuadrës së Luciano Spalletit që po në minutën e fundit kaloi Spezian.
