Xhaçka: Lufta në Ukrainë i ka rrënjët në pushtimin e Krimesë, bota nuk reagoi siç duket asokohe
Nga OraNews Përditësimi i fundit 23 Gusht 2022, 18:09
Ministrja për Evropën dhe Punët e Jashtme, Olta Xhaçka ka marrë pjesë sot, 23 gusht 2022, në samitin virtual “Plaftorma e Krimesë” me ftesë të presidentit ukrainas Volodymyr Zelensky.
Xhaçka në fjalën e saj tha se pjesëmarrja e lartë në këtë samit tregon mbështetjen ndaj Ukrainës ndërsa vijojnë sulmet nga Rusia.
Xhaçka shton se lufta i ka rrënjët në pushtimin e Krimesë pasi aso kohe bota nuk reagoi siç duhej.
Xhaçka: Një vit më parë përfaqësues nga vendet tona u mblodhën në Kiev për prezantimin e Platformës së Krimesë. Jam shumë e lumtur të shoh që sot, një vit më pas, numri i pjesëmarrësve si dhe niveli i përfaqësimit nga vende dhe organizata është rritur. Unë besoj se nuk është vetëm një deklaratë e qartë e mbështetjes për Ukrainën dhe dënimit pa mëdyshje të agresionit të paligjshëm të Rusisë kundër një vendi të pafajshëm, por edhe një njohje e qartë e faktit se gjithçka filloi me pushtimin e paligjshëm të Krimesë në 2014.
Lufta e tanishme, një luftë e pakuptimtë, kriminale që ka shkaktuar vuajtje dhe shkatërrime të tilla, i ka rrënjët në pushtimin e Krimesë dhe në faktin se në atë kohë bota nuk reagoi siç duhet ndaj asaj që ishte një shkelje flagrante e së drejtës ndërkombëtare, të Kartës së Kombeve të Bashkuara dhe të gjithë rendit të bazuar në rregulla. Reagimi i botës ishte i butë. Çmimi që Rusia pagoi për veprimin e saj të paligjshëm ishte i tillë, saqë në vend që të shërbente si pengesë, shërbeu thjesht si inkurajim për luftën aktuale.
