Turizmi si para pandemisë, në portin e Vlorës përgjatë korrikut kanë hyrë rreth 16 mijë persona
Nga Edi Ruçi Përditësimi i fundit 26 Korrik 2022, 17:07
Përkundër imazheve të plazheve me pak pushues në jug të vendit, të dhënat nga autoritetet portuale tregojnë se turizmi po rikthehet në nivelet e para pandemisë.
Në Portin e Vlorës përgjatë korrikut kanë hyrë rreth 16 mijë pasagjerë, shifër e njëjtë me korrikun e vitit 2019.
"Vjet në muajin korrik hyrje-daljet kanë qenë 4 mijë, sivjet jemi te 16 mijë hyrje dhe dalje. Kemi dhe sektorin e Himarës që vetëm në qershor kishte 3 mijë pasagjerë. Nuk i kemi pasur as përpara pandemisë kaq në Himarë. Shumica janë të huaj."
Heqja e gjithë kufizimeve të pandemisë duket se është një nga arsyet që ka shtuar fluksin e turistëve këtë verë.
Gushti pritet të ketë edhe më tepër pasagjerë.
Festim Skëndaj, shefi i përpunimit të të dhënave në Portin e Vlorës thotë se janë marrë të gjitha masat për t`ju përgjigjur numrit të lartë të udhëtarëve.
Të dhënat janë pozitive edhe për Portin e Durrësit ku rezulton se tragetet qe operojnë ne linjat detare Bari-Durrës dhe anasjelltas, kanë dyfishuar numrin e lundrimeve për të përballuar fluksin në rritje të pasagjerëve.
