Lëvizje surprizë nga Luis Suarez, “El Pistolero” bëhet “milioner”
Nga OraNews Përditësimi i fundit 28 Qershor 2022, 09:37
Luis Suarez është shumë pranë argjentinasve të River Plate. Uruguajani që u largua me parametra zero nga Atletico Madrid nuk dëshiron ta vazhdojë karrierën në Europë pasi e ka bërë zgjedhjen e tij.
“El Pistolero” po pret fundin e muajit kur mbyllet zyrtarisht edhe kontrata me “Los Colchoneros” për të bërë njoftimin e transferimit te “Millionarios”. Një marrëveshje e papritur për të gjitha skuadrat e interesuara për sulmuesin amerikano-latin, i cili vendos të mbyllë një kapitull të suksesshëm në kontinentin e vjetër.
Trajneri i bardhekuqve, kampionë në fuqi të Argjentinës, Marcelo Gallardo ka punuar në lidhje me këtë transferim duke e pranuar se Suarez është shumë pranë River Plate që do të synojë të rikthehet në majën e kontinentit për të fituar edhe një herë Copa Libertadores.
Atalanta dhe Inter Miami ishin dy klubet më të përfolura për të afruar sulmuesin uruguajan që zgjodhi 37 herë kampionët e Argjentinës të cilët humbasin shërbimet e Julian Alvarez pasi talenti argjentinas ka zgjedhur Manchester City. Sezonin e kaluar, Suarez e mbylli me 21 gola të shënuar me fanellën e Atletico Madrid që e ndihmoi dy vite më parë në triumfin e La Liga-s.
