Kukësi vijon projektin rinovim. Nënshkruan me mesfushorin që spikati te Kastrioti
Nga OraNews Përditësimi i fundit 27 Qershor 2022, 13:19
Ishte një nga lojtarët më të aktivizuar të Kastriotit me 30 ndeshje dhe dy gola të shënuar dhe këto statistika e ndihmuan të bëjë hapin e madh. Arbër Basha nënshkruan me Kukësin ku do të luajë për tre sezonet e ardhshme pasi ka arritur të bindë drejtuesin e ri të stolit verilindor, Skënder Gega.
Ish-mesfushori i Kamzës dhe Kastriotit është prezantuar si blerja më e re e Kukësit dhe në një intervistë për faqen zyrtare të klubit ai deklaron menjëherë pas firmës:
"Është kënaqësi dhe privilegj për mua të luaj me ekipin e qytetit tim. Përveç këtij fakti, do të luaj me një skuadër që çdo vit ka pretendime të larta dhe natyrisht ky është një motivim akoma më i madh për mua. Tifozët e Kukësit janë të mrekullueshëm dhe shpresoj të bëjmë gjëra të mëdha në stadiumin e ri. Shpresoj që të kontribuoj sa më shumë në ekip me gola dhe asiste për të arritur objektivat që kemi. Forca Kukësi".
Pak ditë më parë, një kontratë po 3-vjeçare nënshkroi edhe sulmuesi Jakup Berisha çka konfirmon trendin e klubit verilindor për të ndjekur strategjinë e kontratave afatgjata.
