Tirana braktiset në fundjavë, kryeqytetasit dynden drejt plazheve
Nga Katerina Hysenllari Përditësimi i fundit 19 Qershor 2022, 17:40
Tashmë që sezoni veror ka filluar, e djela në kryeqytet nuk është aspak e zhurmshme, madje duket sikur Tiranën e ka zënë gjumi.
Pamjet e rrugëve të boshatisura ditën e sotme në kryeqytet vërehen qartë.
Trafiku i rënduar dhe i përhershëm gjatë javës mungon. Teksa temperaturat shënojnë 30 gradë celcius njerëzit kanë zgjedhur të qëndrojnë brenda ose të largohen për të frekuentuar plazhet e pishinat.
Lokalet e boshatisura flasin edhe më shumë për gjumin letargjik që e ka zënë Tiranën. Edhe në një ndër zonat me qarkullimin më të lartë si Rruga e Elbasanit, ka rënë qetësia.
Duket sikur java që lamë pas e ka lodhur mjaftueshëm kryeqytetin, por kjo nuk zgjat shumë, të paktën deri në orët e pasdites kur qindra makina kthehen sërisht në Tiranë.
