Ish-senatori akuzohet për vrasjen e presidentit të Haitit, gjykimi në SHBA, prokurorët zbulojnë si dështoi rrëmbimi
Nga OraNews Përditësimi i fundit 10 Maj 2022, 17:59
Një ish-senator nga Haiti është bërë i dyshuari i tretë që akuzohet në SHBA në lidhje me vrasjen e presidentit të Haitit, Jovenel Moïse.
Moïse u vra në korrik nga persona të armatosur që sulmuan shtëpinë e tij në Port-au-Prince.
Ish-senatori John Joel Joseph akuzohet për "komplot për të kryer vrasje ose rrëmbim" si dhe për sigurimin e mbështetjes logjistike për vrasjen e Moïse.
Ai u arrestua në janar në Xhamajka dhe u ekstradua në SHBA javën e kaluar.
51-vjeçari, i cili ishte një rival politik i Presidentit Moïse, bëri paraqitjen e tij të parë në një gjykatë në Miami të hënën.
Departamenti Amerikan i Drejtësisë argumenton se ka juridiksion në këtë rast, sepse thotë se disa nga bashkëpunëtorët e dyshuar u takuan në Miami për të organizuar vrasjen.
Sipas prokurorëve, ideja fillimisht kishte qenë rrëmbimi i Presidentit Moïse përmes një urdhër-arresti të rremë.
John Joel Joseph
Por kur komplotistët e supozuar nuk mundën të siguronin një avion për të marrë presidentin nga Haiti, ai plan "përfundimisht rezultoi në një komplot për të vrarë presidentin", thonë prokurorët.
Ata e akuzojnë Jozefin për blerjen e makinave dhe përpjekjen për të marrë armë "për të mbështetur operacionin kundër presidentit".
Ata thonë gjithashtu se ai u takua me "bashkëkomplotistët" një ditë para atentatit, "pas së cilës shumë nga bashkëkomplotistët filluan misionin për të vrarë presidentin Moïse".
Policia e Haitit e kishte identifikuar Joseph si të dyshuarin kryesor vetëm disa ditë pas vrasjes së z. Moïse.
Sipas hetimit të policisë haitiane, një grup mercenarësh kryesisht të huaj, 26 kolumbianë dhe dy amerikanë haitianë, hynë në shtëpinë e presidentit në Port-au-Prince më 7 korrik dhe e qëlluan për vdekje.
Një numër i të dyshuarve janë arrestuar në Haiti, por me hetimin e policisë haitiane në dukje të ngecur, të gjithë sytë janë te gjykatat amerikane.
Përveç z. Joseph, dy të dyshuar të tjerë po përballen me akuza në gjykatat amerikane për komplot për të kryer vrasje ose rrëmbim.
Ata janë ish-ushtari kolumbian Mario Palacios, 43 vjeç, i cili u deklarua i pafajshëm muajin e kaluar dhe biznesmeni nga Haiti-Kilia, Rodolphe Jaar, 49 vjeç.
Nëse shpallen fajtorë, ata mund të përballen me burgim të përjetshëm.
