Busti i heroit Hasan Prishtina vendoset në qytetin bregdetar, nipi: U përmbush amaneti
Nga Edi Ruçi Përditësimi i fundit 7 Maj 2022, 14:53
Busti i Heroit, Hasan Prishtina, është vendosur në qytetin e Vlorës. Të shtunën në një ceremoni të organizuar nga bashkia e Vlorës, kanë marrë pjesë personalitete të larta të politikës së Kosovës.
Është vendosur në Vlorë, busti i Heroit Hasan Prishtina. Në ceremoninë e inagurimin të kësaj përmendoreje ishin prezent, nipi i Hasan Prishtinës Mehmet Prishtina, Ministri i Mbrojtjes së Kosovës Armend Mehaj, Kryetari i Bashkisë së Prishtinës, Përparim Rama, si dhe Kryetari i Bashkisë së Drenasit Lladrovcki, e ambasadori i Kosovës në Shqipëri, Skendër Durmishi të cilët u pritën në ceremoni nga autoritetet vendore.
Nipi i heroit kombëtar u shprehet se me vendosjen e shtatores së Hasan Prishtinës në Vlorë ka përmbushur në këtë mënyrë amanetin e tij për tu prehur në atdhe.
Mehmet Prishtina: Sot jemi këtu në Vlorë për të sjellë pas 110 viteve monumentin e një ideatori krahpërkrahë me Ismail Qemalin të pavarësisë së Shqipërisë. Ta quajmë Shqipëri londineze, apo gjysëm Shqipëri e cila me ëndrrën, zemrën dhe mendjen tonë rrugëton edhe pas 100 vjetësh për bashkim.
Ndërsa kanë përshëndetur vendosen e përmendores së Hasan Prishtinës në Vlorë edhe autoritetet e mbërritura nga Kosova,si kryebashkiaku Rama, të cilët vendosjen e përmendores në Vlorë e shohin si simbolik që heroi kombëtar nuk i përkiste vetëm Kosovës por i përkiste gjithë Shqipërisë.
Busti i Hasan Prishtinës është vendosur pranë Pallatit të Kulturës "Labëria" në Vlorë teksa përballë ka bustin e plakut të urtë të pavarësisë Ismail Qemali si simbolikë e bashkimit kombëtar.
