Përgjimet e drogës në Korçë, avokati dhe dy persona të tjerë u ndaluan në pikën kufitare
Nga Elton Qyno Përditësimi i fundit 3 Maj 2022, 15:51
66 kilogramë drogë është kapur nga policia në pikën doganore në kufi me Maqedoninë. Në pranga ka rënë një avokat dhe dy persona të tjerë, ndërsa në dosjen e Prokurorisë thuhet se ata kanë qenë në përgjim.
Joni Musku, një avokat në Korçë, rezulton të jetë pjesë e një hetimi për trafik droge nga Shqipëria në Greqi dhe Maqedoni.
Nga hetimet e kryera nga Prokuroria e Korçës, avokati Joni Mosku akuzohet se gjatë ditëve të javës shërbente si mbrojtës ligjor i qytetarëve të ndryshëm, ndërsa në fundjavë shërbente si transportues i lëndëve narkotike.
Rasti është zbuluar falë hetimeve disa mujore, të cilat vërtetuan aktivitetin e paligjshëm të avokatit dhe një personi tjetër, që quhet Ligor Romançka.
Në përgjimet e Prokurorisë, Romançka identifikohet me nofkën “Golja”, ndërsa dy personat e tjerë, nga katër që janë marë të pandehur, janë Idriz Manej me pseudonimin “Shkodrani” ose “Gjyshko” dhe i shoqëruari, Andrea Çiko, me pseudonimin “Turi Spatka”.
I proceduar për këtë çështje është dhe Albion Çiko, si njeriu që ka bërë modifikimin e makinave në servisin që është në pronësi të Andrea Çikos ose “Turi Spatkës”, që ndodhet në zonën e fshatit Vloçishtit të Korçës.
Një gjë e tillë është bërë në automjetin tip “Opel Meriva”, i cili u konstatua në doganën e Goricës, se ishte i ngarkuar me lëndë narkotike.
Drejtues i këtij automjeti, brenda të cilit u zbulua nga qeni nuhatës i policisë një sasi prej 66 kg kanabis sativa, ishte pikërisht avokati Mosku, i cili është arrestuar menjëherë pas konstatimit të kanabisit.
Veprimi ka vënë në alarm dhe dy të akuzuarit e tjerë “Golja” dhe “Gjyshko”, të cilët menjëherë sapo kanë konstatuar operacionin, kanë dalë nga rreshti i makinave që ishin në pikën kufitare në drejtim të Maqedonisë, duke u kthyer në drejtim të Korçës.
Por një lëvizje e tillë, është vënë re nga agjentët e vëzhgimit, të cilët kanë bërë ndalimin e tyre gjatë rrugës në kthim, duke i komunikuar arrestimin për llogari të Prokurorisë së Korçës.
