Rama: Shqipëria në konferencën e donatorëve për Ukrainën. Hesht për kërkesat e Zelenskit
Nga OraNews Përditësimi i fundit 3 Maj 2022, 13:29
Shqipëria do të jetë e pranishme në konferencën e donatorëve për Ukrainën që do të mbahet më 5 maj në Poloni.
E bëri të ditur kryeministri Edi Rama pas fjalës së mbajtur nga presidenti i Ukrainës Zelensky drejtuar Kuvendit Shqiptar me një fjalë, drejtpërdrejtë nga Kievi.
Edi Rama: "Të gjithë shqiptarët kudo që jetojnë jemi rreshtuar krah jush me zemër, mendje e çdo gjë kemi mundur. Shqipëria është një vend shumë më i vogël sesa Ukraina dhe mundësitë tona janë modeste krahasuar me madhësinë marramendëse të sfidës tuaj. Kemi besuar që në fillim që në aspektin e mbështetjes materiale vendi ynë nuk mund të bëjë asnjë diferencëc në këtë luftë Shqipëria mund të jetë e vlefshme për Ukrainën me zërin e saj qoftë në tryezën e NATO-s apo të Kombeve të Bashkura. Pasnesër më 5 maj Shqipëria do të jetë e pranishme në konferencën e donatorëve për Ukrainën për të dhënë kontributin tonë modest"
KLIKONI KËTU PËR LAJMET MINUTË PAS MINUTE
Por në fjalimin e parapërgatitur të kryeministrit Rama nuk u dha përgjigje për kërkesat që presidenti Zelensky drejtoi drejtëpërdrejtë në videomesazh, mes tyre dhe ndalimi i marrëdhënieve tregtare dhe mbyllja e porteve dhe ndalimi i turistëve rusë në Shqipëri.
Fjala e kryeministrit Edi Rama
Shkëlqesia Juaj, Presidenti i Ukrainës,
Mik i nderuar,
ky parlament që sot ka nderin të mblidhet t’ju dëgjojë, nuk shquhet për shpirtin e dakordësisë mes palëve.
Janë shumë të rralla në tridhjetë vjet pluralizëm, rastet kur në këtë parlament palët kanë rënë dakord dhe mbështetja, megjithë mend e megjithë zemër, e rezistencës ukrainase ndaj pushtuesve rusë, është një nga ato raste, edhe më të rralla, kur të gjithë ne këtu, kemi qenë dakord pa bërë as më të voglin diskutim.
Qysh prej orës së parë të agresionit mbi Ukrainën, jo vetëm ne, po krejt Shqipëria, të gjithë shqiptarët kudo ku jetojnë, i gjithë kombi ynë, përfshirë edhe shtetin tjetër shqiptar, Kosovën, jemi rreshtuar krah jush, me zemër, me mendje, e me çdo gjë kemi mundur.
Shqipëria është një vend shumë më i vogël se sa Ukraina zoti President. Mundësitë tona për t’ju ardhur në ndihmë janë krejt modeste, krahasuar me madhësinë marramendëse të sfidës suaj.
Por, ne kemi besuar qysh në fillim, se nëse në aspektin e mbështetjes material, vendi ynë nuk mund të bëjë asnjë diferencë në këtë luftë, Shqipëria mund të jetë e vlefshme për Ukrainën me zërin e saj, qoftë në tryezën e NATO-s, qoftë në tryezën e Këshillit të Sigurimit të Kombeve të Bashkuara, ku kemi pasur nderin të jemi edhe bashkënismëtarë të disa qëndrimeve domethënëse kundër agresionit rus. Pasnesër, më 5 maj, Shqipëria do të jetë e pranishme edhe në Konferencën e Donatorëve, për Ukrainën të thirrur nga Polonia në Varshavë, ku do të japim edhe ne kontributin tonë modest.
Edhe pse mizorinë e kësaj lufte nuk mundet ta perceptojë sa e si duhet askush tjetër, përveç popullit ukrainas, më lejoni t’ju them i nderuar President Zelensky, se historia jonë e afërt, kur gjysëm milionë shqiptarë u shpërngulën me dhunën e spastrimit etnik, nga trojet e tyre në Kosovë dhe gjetën strehë në Shqipëri, na ndihmon sidoqoftë të ndjejmë nga larg dhimbjen e madhe të Ukrainës.
Ndarja e nënave e fëmijëve nga baballarët që qëndrojnë për të luftuar, mobilizimi i vajzave që marrin armët për të rezistuar, qëndresa juaj e palëkundur në krye të shtetit që nuk pranon të dorëzojë liritë e fituara, të gjitha pamjet e dëshmitë e kësaj tragjedie të paimagjinueshme deri ditën e hyrjes së trupave ruse në territorin sovran të Ukrainës, janë përveçse sakrifica ekstreme e një populli liridashës edhe një shërbim i paçmuar, që ju dhe vendi juaj po i bëni të gjithë botës deri dje të përgjumur demokratike.
I dashur miku ynë Presidenti Zelensky,
e kujtoj shpesh këto kohë bisedën tonë në Kiev dhe dëshirën tuaj që Shqipëria të bëhej vendi ku ukrainasit të kishin shtëpi të dyta për pushimet e tyre. “Jemi shumë afër për të qenë kaq larg!”, thatë ju me kënaqësinë e dikujt që ka zbuluar një vend të bukur pranë shtëpisë.
Të gjithë e dimë tanimë se kjo luftë mund të mos jetë e shkurtër, ashtu sikundër çdo ditë që kalon, me tmerre të reja, e zgjat ende më shumë shtegun shumë të ngushtë drejt paqes. Por unë e besoj sinqerisht zoti President, se nëse sot në Shqipëri po vijnë ukrainasit që ikin për të mbrojtur fëmijët e tyre nga lufta, nesër dëshira juaj, që ata të vijnë këtu, në shtëpitë e tyre të dyta, për të kaluar pushime të gëzuara familjarisht, do të bëhet realitet.
Unë dhe të gjithë ne këtu do të donim t’ju thoshim sot shumë gjëra, por ju keni me siguri shumë gjëra të tjera më të rëndësishme për të bërë i nderuar President, kështu që lejomëni ta mbyll këtë fjalë, duke ju shprehur në emër të Shqipërisë e të shqiptarëve, të gjithë mbështetjen, respektin dhe miqësinë tonë.
Zoti qoftë me ju dhe me Ukrainën heroike!
