Dënim Rusisë dhe Ramës, Kuvendi dënon sulmin ndaj Ukrainës, opozita: Hiqni dorë nga Open Balkan
Nga OraNews Përditësimi i fundit 7 Mars 2022, 20:15
Parlamenti shqiptar ka miratuar rezolutën për të dënuar sulmin ndaj Ukrainës dhe vendosjen e sanksioneve ndaj Rusisë. Edhe pse me një qëndrim të përbashkët sa i përket agresionit të Moskës, parlamentarët e opozitës kërkuan nga Edi Rama heqjen dorë nga Open Balkan.
Me simbolin e flamurit të Ukrainës në krah të atij shqiptar, dhe me fjongon me ngjyrat e flamurit të këtij shtetit, deputetët shqiptarë kanë miratuar rezolutën ku konfirmojnë sanksionet ndaj Rusisë dhe duke dënuar agresionin rus.
Edhe pse një seancë në simbol kundër luftës, propozimi i Taulant Ballës për të lejuar të flasin vetëm kryetarët e grupeve solli pakënaqësi mes parlamentarëve.
Balla: Ta kufizojmë diskutimin dhe të shkojmë direkt në votim.
Spaho: Me çfarë të drejte më hiqni mua nga lista e folësve.
Madje deputeti i PD-së, Bujar Leskaj, është detyruar të lërë për pak minuta foltoren, duke ia dhënë fjalën Berishës.
Berisha: Kjo që ndodh është një urdhër i atij që la tishertin dhe ja mbathi.
Edhe pse të ndarë në dy mendje, mazhorancë e opozitë kishin si emërues të përbashkët dënimin e Rusisë edhe pse nuk mungojnë akuzat se me Open Balkan, Rama i shërben Rusisë e Serbisë.
Basha: Të miratojmë sa më parë projekt-rezolutën tjetër e cila ka të bëjë tashmë me impaktin, derdhjen e toksinave të konfliktit në rajon ku ndodhet i vetmi vend europian që ka refuzuar sanksionet kundër Rusisë.
Berisha: Ambiciet e Rusisë kanë qenë dy më kryesoret, Adriatiku dhe Dardanelet.
Kryeministri Edi Rama ka biseduar me presidentin Zelensky për mbështetje të Ukrainës, ndërsa mazhoranca në Kuvend theksoi dënimin e sulmit ndaj një shteti që synon integrimin në NATO e BE.
Ndërsa ambasadori Vlodimir Shukurov ka ndjekur punimet e Kuvendit, ndërsa më herët ka falenderuar vendin tonë për mbështetjen.
