Shqipëria në Këshillin e Sigurimit, Rama: Nuk kemi fuqi materiale por do të sjellim vlerat tona në OKB

Nga OraNews Përditësimi i fundit 15 Shkurt 2022, 13:52

Kryeministri Edi Rama, para anëtarëve të Këhshillit të Sigurimit në OKB, nuk ka arritur të fshihte emocionet gjatë pritjes së organizuar nga Shqipëria në New York.

Mandati i përkohshën në këtë Këshill nuk është vetëm një arritje për vendin tonë, por sipas Ramës, ky vendim është një ëndërr e bërë realitet në karrierën e tij politike.

Rama: Vetëm një imagjinatë pa fre do kish guximin ta ëndërronte diçka të tillë veç tri dekada më parë. Madje dyshoj se edhe imagjinata më e shfrenuar nuk do kish qenë dot aq e shfrenuar sa ta ëndërronte këtë tri dekada më pare. Asokohe, Shqipëria ishte një bunker në terr. Për thuajse gjysmë shekulli, ajo u zvarrit nën një nga regjimet komuniste më shtypëse në Europë, që e bëri vendin tonë, më duhet ta them, Korenë e Veriut të Europës.

Ndryshe nga fjalimet e tij politike në Shqipëri, para zyrtarëve të OKB-së kryeministri Rama tregoi modestinë e fuqisë së vendi tonë përpara fuqive të mëdha.

Rama: Ne nuk i sjellim fuqi materiale Këshillit të Sigurimit-së paku, jo tani – por nuk është fuqia ajo çka i mungon Këshillit të Sigurimit. Ne jemi angazhuar të sjellim zërin, vlerat dhe normat tona në punën e përbashkët të Këshillit të Sigurimit, si kontribut për paqen. Ne dëshirojmë të ndajmë me të tjerët përvojat e jetuara, mësimet e marra.

Shqipëria, sipas Ramës, në këtë mision dy vjeçar do të jetë një zë për vendet që kanë nevojë për kontributin e Këshillit të Sigurimit.

Në fjalën e tij Kryeministri shqiptar solli në vëmendje detyrën e vendit tonë gjatë periudhave të vështira për të gjithë botën.

Rama: U kemi hapur shtëpitë dhe zemrat atyre që kanë nevojë për shpëtim dhe strehë; qofshin ata hebrenjtë gjatë Holokaustit, apo për gjysmë milionë kosovarë, që iknin nga spastrimi etnik i regjimit mizor të Sllobodan Milosheviçit. apo mijëra pjesëtarë të MEK-ut, që janë strehuar të sigurt në Shqipëri dhe, me së fundi, mijëra afganë që u arratisën nga reprezaljet e talibanëve.

Në fjalimin e tij, nuk munguan rreshta të ngjashëm me kohën kur drejtonte OSBE-në, në të cilat kërkoi nga Këshilli i Sigurimit që përveç synimit të paqes dhe sigurisë, duket të ketë objektiv drejtësinë dhe llogaridhënien, si e vetmja mënyrë për të shkuar drejt pajtimit.