Tritoli te Duka "pa motiv", një javë pas sulmit ndaj kreut të FSHF s'dihet arsyeja
Nga OraNews Përditësimi i fundit 31 Janar 2022, 22:20
Një javë pas sulmit me tritol në hyrje të banesës së Presidentit të FSHF Armand Duka, policia dhe Prokuroria e Durrësit kanë ndaluar një person të dyshuar por ende nuk kanë zbardhur motivin e ngjarjes.
34-vjeçari Arlen Hasanaj u la në burg pa afat nga Gjykata në një seancë me debate të forta pasi avokati Ilia Ilia, paraqiti video nga kamerat e sigurisë.
Videot tregonin se klienti i tij ndodhej në një qendër tregtare mbrëmjen ku ndodhi ngjarja dhe më pas ka udhëtuar drejt Durrësit, ku mjeti i tij është fiksuar nga kamerat e rrugëve të qytetit.
Prokuroria kërkoi masën e arrestit me burg duke e bazuar në dy prova kryesore, e para është një plagë në dorën e 34-vjeçar që banon në të njëjtën zonë me presidentin e FSHF-së.
Dëmtimi sipas prokurorisë mund të jetë krijuar në momentin e ndezjes së fitilit.
I arrestuari ka si alibi faktin se dëmtimi nuk ka lidhje me ngjarjen dhe për këtë arsye është vendosur të kryhet një ekzaminim mjeko-ligjor i dorës por edhe i rrobave që ai kishte veshur ditën e arrestimit për të parë nëse ka prani baruti.
Prova e dytë e prokurorisë lidhet me kamerat e sigurisë ku pretendohet se prania e 34-vjeçarit në një ambient të survejuar, ka qenë pikërisht për të pasur një alibi.
Me gjithë këto dyshime të prokurorisë deri më tani, si kreu i FSHF por edhe nga vetë i arrestuari si autor i ngjarjes i cili ka në pronësi një biznes kanë pohuar se nuk e njohin njëri-tjetrin dhe se nuk kanë pasur probleme qoftë familjare apo edhe për detyrën.
