Marketingu në politikë, Axhami: Politika të bëjë kërkime mbi opinionin publik, të merret me votuesit
Nga OraNews Përditësimi i fundit 19 Janar 2022, 16:10
Mirdaim Axhami në një intervistë për Ora News, ka komentuar marketingun në politikë, duke thënë se politika duhet të bëjë kërkime mbi opinionin publik duke u fokusuar tek votuesit.
Ai tha se janë dy kategori votuesish, ato besnikë dhe të lëkundur, dhe nisur nga kjo pedagogu tha se partitë politike duhet të përgatisin produktin e tyre politikë bazuar në këto kategori.
Axhami: Kur bëhet fjalë për marketingun në politikë, nuk kemi parasysh vetëm elementin e fushatës elektorale apo komunikimin politik, por shumë më tepër se sa kaq. Elementi i parë kryesor që duhet të bëjnë partitë politike janë kërkimet apo studimet mbi opinionin publik. Dy janë kategoritë kryesore të votuesve: Një janë votuesit besnikë dhe votuesit e lëkundur që nuk kanë votuar gjithmonë të njëjtën parti. Ky është një element që partitë politike e kanë sfidë për të identifikuar duke ditur se kur të realizojnë produktin politik ta kenë të diferencuar për mbështetësitë e tyre besnikë dhe për të lëkundurit. Sipas studimeve të lëkundurit janë më të rinj në moshë, janë të arsimuarit dhe emigrantët.
Ai u shpreh se: marketingu në politikë ka ndikim kur pranohet se zgjedhjet janë të lira dhe të ndershme. Ne akoma nuk kemi arritur kulturën e vendeve fqinje që pasi mbarojnë një palë zgjedhje ata që kandidojnë me njëri-tjetrin të dalin dhe të pranojnë humbjen.
Intervistoi Anila Zyberaj, përgatiti Anila Kolgjini.
