“Nënë Tereza në jetën time”, promovohet libri i Liri Berishës, vjen në formë kujtimesh
Nga OraNews Përditësimi i fundit 20 Nëntor 2021, 12:44
Liri Berisha rikthehet në publik, këtë herë duke ndarë me lexuesit një libër me kujtime për Nënë Terezën. Ajo thotë se libri risjellë në vëmendje vlerat e paçmuara të bamirëses shqiptare teksa fton të rinjtë ta lexojnë atë.
Libri “Nënë Tereza në jetën time” risjellë në sytë e publikut Liri Berishën, ish-zonjën e parë dhe bashkëshorten e liderit historik të Partisë Demokratike Sali Berisha.
Duke dashur t`i qëndrojë larg betejës politike të bashkëshortit të saj, Liri Berisha vjen si autore e një libri ku tregon njohjen e saj me Nënë Terezën, duke ndarë emocione nga kjo histori e duke theksuar vlerat e mëdha e të paçmuara të bamirëses shqiptare.
"Ka brenda emocionet, ngjarjet, kujtimet, bisedat e mia me Nënë Terezën. Ka njohjen time me Nënë Terezën atëherë unë nuk e njihja se kush ishte, kur e njihja si vajza me emrin Gonxhe që bënte të lotonte shpesh herë nënën Drane dhe motrën e saj nga malli," thotë zonja Berisha.
Libri thotë ajo duhet lexuar sidomos nga të rinjtë, që jo të gjithë e njohin veprimtarinë e Nënë Terezës.
"Për mua ka qenë model i papërsëritshëm, ka ndikuar fuqishëm në jetën time. Është një simbol i përbotshëm vlerash për të cilat brezi i sotshëm nuk i njeh," shtoi zonja Berisha.
Libri i Liri Berishës që vjen në formë kujtimesh shoqërohet nga shumë fotografi personale të autores me Nënë Terezën.
