Rishfaqet Zani Çaushi në gjykatë, kërkon ti llogaritet me ditë qëndrimi koha e paraburgimit
Nga Elton Qyno Përditësimi i fundit 4 Nëntor 2021, 13:38
Rishfaqet sërish në Gjykatën e Korçës, i dënuari me burgim të përjetshëm, Myrtyeza Çaushi.
Njeriu që konsiderohet, si “i forti” i Vlorës, në datën 2 nëntor 2021, i është drejtuar me një kërkesë gjykatës, duke kërkuar prej kësaj të fundit përllogaritjen e ditëve të qëndrimit në paraburgim.
Zani kërkon nga gjykata që të bëjë një llogaritje matematikore të ditëve, duke filluar nga data 1 shtator 1999 deri në ditën kur ai është dënuar me vendim të formës së prerë nga Gjykata e Apelit Tiranë.
Çështja momentalisht ndodhet në tavolinën e një gjyqtari në Korçë, ndërsa ende nuk është caktuar një datë fikse për nisjen e gjykimit.
Myrteza Çaushi, prej 2 vitesh pretendon të dali nga burgu i sigurisë së Lartë në Drenovë. Ndërsa dy kërkesat e tij për lirim me kusht janë rrëzuar nga gjykata e Korçës. Myrteza Çaushi, pretendon se ka kryer ¾ e masës së dënimit, duke argumentuar se ka vuajtur pjesën më të madhe të dënimit dhe njëherësh shton se qëndrimi i tij në burg ka sjellë rehabilitimin.
Zani Çaushi do të mbahet mend edhe si kreu i bandës kriminale, me të cilin ish-kryeministri italian asokohe Romano Prodi, pati një pritje për rivendosjen e rregullit në Shqipëri dhe krijimin e qeverisë së pajtimit.
Çaushi ishte kreu i një prej bandave në qytetin e Vlorës, gjatë trazirave të vitit 1997.
Më 14 maj 2020, Myrteza Caushi me vetëm një fletë dhe argumentat e “Sjelljes së mire në burg” dhe fëmijët e mitur, i kërkoi gjykatës së Korçës, lirimin me kusht, ndërsa avokati s’qaroi se kjo e drejtë lind për shkak se Çaushi ka qenë 31 vite në burg, ku edhe aktualisht ndodhet në qelitë e burgut të Drenovës.
Por sjellja e mirë duket se ishte vetëm në letra, pasi gjatë vuajtjes së dënimit, Myrteza Caushaj, ka vijuar të kryejë vepra penale. Sipas prokurorisë, i forti i Vlorës është dënuar mbi 3 herë për akuzën e “Futjes dhe Mbajtjes në ambientet e burgut të sendeve të palejuara”, elementë këto që faktojnë se ai nuk është rehabilituar. Në muajin prill 2020 ndaj Myrteza Çaushit ka marrë masë disiplinore nga Drejtoria e Burgut Drenovë, për shkak të një revolte brenda në burg, por më pas kjo masë është hequr nga gjykata.
Myrteza Çaushi është i dënuar me burgim të përjetshëm, si ish- kreu i një prej bandave në qytetin e Vlorës, gjatë trazirave të vitit 1997. Ai dhe banda e tij akuzohen për krime monstruoze.
