Shqipëria, Kosova dhe Maqedonia e Veriut bashkë për promovimin e muzealizmit në rajon
Nga OraNews Përditësimi i fundit 29 Tetor 2021, 16:56
Muzeu Historik Kombëtar, ai i Kosovës dhe i Maqedonisë së Veriut u bënë bashkë në Tiranë për ti dhënë më shumë vëmendje promovimit dhe ballafaqimit të kulturës dhe muzealizmit në rajon. Drejtori i Muzeut Historik Kombëtar, Dorjan Koçi ,shpreh rëndësine e njohjes së të shkuarës pa të cilën nuk mund të ecim drejt së ardhmes.
Muzetë janë arkiva e historisë së kombeve nga e cila mund të nxirren mësime edhe për të ardhmen.
Drejtuesit e muzeve të rajonit janë mbledhur në Tiranë për të diskutuar për forcimin e bashkëpunimit mes tyre, dhe për të promovuar e ballafaquar kulturën dhe muzealizimin në rajon.
Në këtë mënyrë turizmit historik i jepet më shumë vëmendje.
“Muzetë përtërijnë të ardhmen” është slogani që shoqëroi konferencën shkencore ndërkombëtare muzeologjike.
Drejtori i Muzeut Historik Kombëtar, Dorjan Koçi, thotë se pa njohur të shkuarën nuk mund të kemi një të ardhme.
Ai konsideron me rëndësi edhe përfshirjen e aktiviteteve të tjera në ambientet e Muzeut, veç ekspozimit, për t’i dhënë kështu më shumë jetë këtij sektori.
Konferenca shkencore ndërkombëtare muzeologjike organizohet në kuadër të 40-vjetorit të hapjes së këtij institucioni.
Një risi e kësaj konference do të jetë prezantimi i shoqatës miqtë e Muzeut Historik Kombëtar si dhe shpërndarja e diplomave mirënjohëse për kontributorët.
