Krujë, 35 persona paraqiten në spital me shenja helmimi, dyshohet nga uji

Nga OraNews Përditësimi i fundit 25 Tetor 2021, 16:19

35 persona nga Kruja janë paraqitur në spital me shenja helmimi.  Qytetarët pasi kanë marrë ndihmën mjekësore janë lënë të lirë në shtëpi ndërsa ende nuk dihen shkaqet e helmimit të tyre. Paraprakisht burimet bëjmë me dije se shkak i helmimit masiv dyshohet të jetë bërë uji i pijshëm. Organet kompetente kanë marrë tanimë analizat e ujit, ndërsa në orët në vijim pritet të saktësohet se çfarë e ka shkaktuar helmimin e qytetarëve.

Të paktën 35 persona janë paraqitur dy ditët e fundit në spitalin e Krujës me shenja helmimi.

Paraprakisht burimet bëjmë me dije se shkak i helmimit masiv dyshohet të jetë bërë uji i pijshëm.

Vetë pacientët kanë treguar se kanë filluar të ndjehen keq pasi kanë konsumuar ujin që vjen nga çezmat e tyre.

Fatmirësisht të gjithë personat e helmuar pasi kanë marrë mjekimin e nevojshëm, kanë lënë ambientet e spitalit pa pasur komplikime të mëtejshme.

Organet kompetente kanë marrë tanimë analizat e ujit, ndërsa në orët në vijim pritet të saktësohet se çfarë e ka shkaktuar helmimin e tyre.

Lidhur me ngjarjen policia bën me dije se ka nisur edhe një hetim.

Në deklaratën për media, policia nënvizon se ka qenë ajo që ka njoftuar organet e shëndetit publik dhe të AKU-së, për të sqaruar këtë situatë.

Ndërkohë vetë banorët e Krujës thonë se kanë filluar të konsumojnë vetëm ujë të ambalazhuar nga frika e helmimit.

Njoftimi i policisë

Policia e Krujës, pas marrjes së njoftimit mesditën e sotme, nga urgjenca e Spitalit të Krujës, se dy ditët e fundit kanë shkuar për ndihmë mjekësore, rreth 35 shtetas, të cilët dyshohet se janë helmuar, menjëherë ka ngritur grupin hetimor, i cili ka shkuar në spitalin e Krujës dhe vijon punën për sqarimin e rrethanave dhe zbardhjen e shkakut.

Nga ana e Policisë janë njoftuar organet e shëndetit publik dhe të AKU-së, për të sqaruar këtë situatë. Priten analizat nga DSHP Krujë dhe Tiranë.

Grupi hetimor po kryen të gjitha veprimet procedurale, me qëllim zbardhjen e shkakut dhe sqarimin e rrethanave të këtyre rasteve.