“Kaskë e gjakosur” para kryeministrisë, Organizata Politike: Në 8 vite të qeverisë Rama humbën jetën 59 minatorë
Nga OraNews Përditësimi i fundit 22 Shtator 2021, 11:20
59 minatorë kanë humbur jetën në 8 vitet e fundit në vendin tonë. Përpara kryeministrisë, Organizata Politike ka kërkuar që Kryeministri të mbajë përgjegjësi për jetët e humbura gjatë qeverisjes së tij.
Kaska me bojë të kuqe në shkallët e Kryeministrisë, simbolizoi jetët e humbura të të gjithë minatorëve në vendin e punës.
Aksioni para ndërtesës së qeverisë u mbajt pak ditë pasi minatori Muharrem Plaku humbi jtën tragjikisht në një minierë në Bulqizë.
Në aksionin simbolik u kërkua drejtësi për ata që sot nuk janë më, dhe kushte më të mira për të tjerët që punojnë çdo ditë nën tokë.
Aktivistët e Organizatës Politike drejtuan gishtin drejt qeverisë për fatalitetet në frontin e punës.
Përfaqësues të Organizatës Politike nuk folën vetëm për fatalitete, por edhe për kushtet e punës dhe pagat e ulëta të punëtorëve.
Vitin që shkoi 5 minatorë humbën jetën dhe 28 të tjerë u plagosën në minierat e Bulqizës.
