Nis epoka post-Messi. Barcelona fiton të parën ndaj Sociedad, Manaj në stol me katalanasit
Nga OraNews Përditësimi i fundit 15 Gusht 2021, 22:03
Ndeshja e parë pas 18 sezonesh pa Lionel Messin. Nuk është e lehtë për Barcelonën të lërë pas një "jetë" me argjentinasin por është e detyruar të ecë përpara dhe e bën mjaft mirë në ndeshjen e parë në La Liga.
Katalanasit të cilët do të kenë Rey Manajn në ekip këtë sezon, fituan ndeshjen e parë 4-2 ndaj Sociedad në "Camp Nou". Një ndeshje që në dukje u nis dhe u duk e lehtë por u ndërlikua në vijim.
Menjëherë Gerard Pique kaloi në avantazh Barçën në 19' teksa Braithwaite dyfishoi në fund të pjesës së parë.
Në të dytën, sërish danezi Braithwaite shënoi golin e dytë personal dhe këtu katalanasit e lëshuan ndeshjen duke i dhënë mundësinë Sociedadit të shënonte dy herë.
Barça nuk u përfshi nga paniku pasi në shtesë mendoi Sergi Roberto me golin e katërt për të mbyllur llogaritë në 4-2.
Një fitore shumë e rëndësishme që hap një epokë të re pa Messin te Barcelona por ndërkohë i jep një shans të artë Rey Manajt të luajë këtë vit në La Liga teksa sot qëndroi në stol.
