Bashkia Fier ‘ndot’ tenderin e pastrimit, fituese u shpall kompania ‘Kombi Invest’ me ofertën më të lartë
Nga Arnela Avdiaj Përditësimi i fundit 19 Korrik 2021, 17:50
Një tjetër tender ku skualifikohen të gjithë konkurrentët, përfshirë dhe ata me ofertë më të ulët rezulton të jetë zhvilluar nga Bashkia Fier.
Ky institucion nën drejtimin e Armando Subashit ka hapur në qershor të këtij viti procedurën për pastrimin dhe largimin e mbetjeve me një fond limit 198.9 milionë lekë.
Thirrjes i janë përgjigjur 3 operatorë ekonomikë por 2 prej tyre, pikërisht ata që kishin paraqitur ofertën më të ulët janë skualifikuar me argumentin se nuk kishin paraqitur të gjithë dokumentacionin.
Komisioni i Vlerësimit të Ofertave ka kualifikuar e më pas shpallur edhe fitues subjektin ‘Kombi Invest’ me ofertën prej 197 milionë lekësh.
Në fakt rezulton se Victoria Invest ka ofertuar 36 milionë lekë më pak se kompania e përzgjedhur nga bashkia e drejtuar nga Subashi.
Edhe kompania tjeter e skualifikuar Alko impeks, u paraqit me oferten 3 milione leke me pak se fituesi.
Edhe pse në dokumente thuhet se në përzgjedhjen e fituesit do vlerësohet oferta më e favorshme bazuar në çmim, ky kriter nuk është zbatuar.
Për pasoje, në kontrollin e Open Data, ky tender është shënuar me flamur te kuq.
Kontrata është parashikuar të zgjasë për 42 muaj, duke nisur nga muaji korrik i këtij viti e deri në dhjetor të vitit 2024.
Nuk është hera e parë që bashkia e Fierit i ka dhënë firmës ‘Kombi Invest’ tendera, pasi deri tani kjo kompania ka fituar 7 tilla me vlerë 262.7 milionë lekë.
Tenderat janë kthyer në një heshtjet me shqetësuese per buxhetin shtetit pasi kane shkaktuar dëme të konsiderueshme.
Në shumë raporte theksohet se në procedurat e ndjekura nga institucionet, ka skualifikime të ofertave më të ulëta, kompani të favorizuara apo edhe vendosja e kritereve të tepërta, duke sjellë pabarazi në garë.
