Kuvend për humbjen dhe ringritjen, PD zgjedh të shtunën Këshillin e ri Kombëtar, nis ristrukturimi

Nga Everest Dedaj Përditësimi i fundit 16 Korrik 2021, 16:20


7 mijë e 500 delegatë janë thirrur  të shtunën për të marrë pjesë  në Kuvendin Kombëtar të Partisë Demokratike ku do të diskutohet mbi analizën e humbjes së zgjedhjeve, për të miratuar ndryshimet në statut dhe për të zgjedhur Këshillin e ri Kombëtar. Në Kuvend, Lulzim Basha, pritet të shpalosë platformën e tij për ringritjen e PD-së dhe për qëndrimet që do të mbajë ndaj institucioneve gjatë mandatit të tretë të qeverisë Rama.

Partia Demokratike të shtunën në orën 11:00 do të mbledhë Kuvendin Kombëtar ku 7 mijë e 500 delegatë janë thirrur për të miratuar ndryshimet në statut dhe për të zgjedhur Këshillin e ri Kombëtar. 

Në Kuvend do të diskutohen edhe qëndrimet politike si dhe faza e parë e analizës për zgjedhjet e 25 prillit.

Janë rreth 12 propozime të Lulzim Bashës për ndryshimet në statut, të cilat janë kryesisht teknike dhe sjellin ndryshime thelbësore, përfshirë dhe mosprekjen e mandatit të kryetarit.

Fatbardh Kadilli dhe Edit Harxhi, kërkuan ndryshime në statut, ku kryesorja ishte largimi i kryetarit, në qoftëse humb zgjedhjet.

Kuvendi parashikohet të zgjasë disa orë, pa parashikuar procesin e numërimit të votave për Këshillin Kombëtar.

Lulzim Basha, do të mbajë fjalën kryesore, ku do të mbajë qëndrimet politike për hapjen dhe strukturimin e PD-së, por dhe për raportin që do ketë me institucionet, përfshirë Kuvendin.

Në Kuvend do të flasin edhe 19 drejtuesit politik që udhëhoqën betejën e 25 prillit.

Pjesa më e madhe e punimeve të së shtunës do i dedikohet zgjedhjes së 300 anëtarëve të ri të Këshillit Kombëtar,  mandati i të cilit u ndërpre para kohe.

Lista u prezantua në Kryesi, ndërsa bie në sy se edhe në Këshillin e ri do të jenë pjesë ata që njihen si kritikët  e Lulzim Bashës, duke nisur nga Edit Harxhi, Arben Ristani apo Fatbardh Kadilli apo edhe deputetja  Fatjona Dhimitri që nuk pranoi të digjte mandatin e deputetes.

Bujar Nishani, një  ndër zërat më të ashpër  ndaj lidershipit demokrat,  pritet të largohet  nga drejtimi i këtij organi por jo nga përbërja e tij, pasi për shkak të funksionit si ish-President ai është automatikisht  pjesë e tij si anëtar i thjeshtë.  

Me Këshillin e ri Kombëtar, Partia Demokratike nis një fazë të gjerë ristrukturimi, duke nisur nga nënkryetarët, sekretarët e më pas edhe ristrukturimin në bazë.