"Më ka shitur pronën, sa lekë ke marrë?!" Video e incidentit në gjykatën e Vlorës, vëllezërit mbështesin pas murit gjyqtarin

Nga Edi Ruçi Përditësimi i fundit 16 Korrik 2021, 11:52

Ora News siguron videon e përplasjes në gjykatën e shkallës së parë të Vlorës mes gjyqtarit Arqile Basho dhe tre vëllezërve Myslimi.

Debati ka nisur në sallën e gjyqit menjëherë sapo gjyqtari ka komunikuar vendimin me të cilin nuk kanë qenë dakord tre vëllezërit.

Ndërsa njëri prej tyre filmon, dëgjohen ndërsa flasin.

"Nuk e dëgjoiva mirë, se nuk dëgjoj mirë nga veshët."

"Je supergjykatës gjë?!"

"Ti e ke dhënë për herë të dytë këtë vendim, e shikoni? Ky është ai gjyqtari që jep vendime të gabuara. Arqileja, më ka shitur pronën mua ky. Jep vendime të gabuara. Ky i shet gjyqet. Arqileja".

Gjyqtari pas kësaj largohet nga salla. Por vëllezërit Myslym Myslimi 60 vjeç, Fatosh Myslimi, 62 vjeç dhe Elmaz Myslimi, 64 vjeç e ndjekin nga pas në korridore, njëri prej tyre duke filmuar.

"Hajde mos ik se ke shitur gjyqin. E ke shitur gjyqin ti." thërret njëri prej tyre që filmon gjatë gjithë kohës.

Ndërsa gjyqtari largohen në korridorin e dytë, njëri nga vëllezërit e ndalon dhe mbështet pas murit duke i tërhequr mantelin e gjyqtarit.

"E ke shitur gjyqin, sa lekë ke marrë? Ja ky është Arqileja".

Tensioni vazhdon ndërsa gjyqtari rrethohet nga tre vëllezërit.

"Ruani qetësinë!" u bën thirrje gjyqtari Basho.

Më pas gjyqtari largohet.

"Ky ky, është ai gjyqtari që jep vendime të gabuara" thërret sërish një nga vëllezërit.

Policia njoftoi sot se ka arrestuar të tre vëllezërit për kundërshtim me dhunë të gjytarit.

Gjyqtarët e Apelit të Vlorës reagojnë për koplegun

Ne, magjistratët e juridiksionit të Apelit Vlorë, shprehim shqetësimin e thellë në lidhje me aktin e dhunshëm të palëve ndërgjyqëse ndaj gjyqtarit Arqile Basho të datës 15.07.2021, të transmetuara gjatë edicioneve informative në televizion dhe dënojmë me forcë çdo akt që cenon sigurinë e magjistratëve.

Në kronikë është transmetuar gjuhë jo etike dhe fjalor fyes ndaj gjyqtarit së çështjes. Akte të tilla të përbëjnë kërcënim serioz jo vetëm ndaj magjistratëve, por ndaj të gjithë sistemit të drejtësisë e idealeve themelore të një shoqërie të hapur dhe shtetit të së drejtës.

Shprehim mbështetjen e palëkundur ndaj gjyqtarit Arqile Basho dhe të gjithë anëtarëve të personelit të sistemit gjyqësor për të garantuar sigurinë e tyre, në mënyrë që të jetojnë e të ushtrojnë detyrën pa frikën e kërcënimeve nga armiqtë e drejtësisë.

Shprehim falënderimin për bashkëpunimin e ngushtë dhe reagimin e menjëhershëm të agjencive ligjzbatuese për arrestimin dhe vënien para përgjegjësisë të autorëve të akteve të tilla të dhunshme, me qëllim ndëshkimin e tyre dhe parandalimin e ngjarjeve të tilla të rënda.

Për nga natyra e vet, veprimtaria gjyqësore shkakton pakënaqësi ndaj njërës apo tjetrës palë, por në një shtet të së drejtës, mjeti ligjor për të kundërshtuar një vendim gjyqësor është ankimi në një gjykatë më të lartë, sipas legjislacionit në fuqi, jo dhuna verbale apo fizike ndaj magjistratit.

Sjellim në vëmendjen e opinionit publik se respektojmë rolin e pazëvendësueshëm të medias për informimin e publikut në lidhje me veprimtarinë e sistemit gjyqësor, por nga ana tjetër, edhe media duhet të respektojë dinjitetin e gjykatës dhe të magjistratëve, duke mos përcjellë informacion që përmban gjuhë apo imazhe fyese, që cenojnë figurën e gjyqtarit. Respekti ndaj gjykatës dhe figurës së magjistratit i shërben si forcimit të drejtësisë, ashtu edhe lehtësimit të komunikimit efektiv me publikun rreth veprimtarisë së sistemit gjyqësor.

Të udhëhequr nga parimet e profesionalizmit, transparencës, ndershmërisë, llogaridhënies dhe besueshmërisë, shprehim angazhimin për rikthimin e besimit të publikut në sistemin gjyqësor, i cili ka si një ndër objektivat e tij kryesorë forcimin e bazave për përmirësimin e marrëdhënieve të gjyqësorit me median, në çdo rast duke garantuar respektin reciprok.