"Lëvizin çdo 1 orë", studentët e Durrësit ankohen për autobusët: Nuk kapim dot provimet dhe marrim taksi
Nga Mark Brunga Përditësimi i fundit 2 Korrik 2021, 15:24
Frekuencat e lëvizjes të autobusëve që të dërgojnë drejt Kampusit Universitar në zonën e Spitallës në Durrës nuk i përmbushin nevojat e studentëve.
Vetë ata shprehen se janë detyruar të marrin dhe taksi, pasi janë në sezon provimesh, e linjat urbane kanë vonesa të shumta.
"Tani që është sezoni i provimeve janë mbi 10 mijë studentë. Autobusët vijnë çdo 1 orë, kjo shkakton vonesa për provim. Duhet të marrim taksi ose mjet tjetër privat. Kjo ka kosto."
"Duhet të merremi dhe me stresin e transportit."
Pakënaqësi kanë edhe për kushtet higjenike si dhe mungesën e ajrit të kondicionuar, në kohën kur temperaturat janë tejet të larta.
"Në autobusë studentët ngjeshen si salçiçe, nuk ka kushte higjienike, kondicionerë ka por nuk i ndezin."
Kërkojnë nxjerrjen e aboneve për studentët.
"Linja e transportit nuk ka nxjhrrë me abone studenti që nga shtatori."
Prej kohësh studentët e universitetit “Aleksandër Moisiu” kanë shprehur shqetësimet e tyre për transportin urban e kërkojnë ndërmarrjen e masave ndaj kompanisë së transportit, e cila është në varësi të Bashkisë.
