Zjarri në fabrikën e tullave në Maminas, gjykata liron përgjegjësin teknik
Nga Mark Brunga Përditësimi i fundit 31 Maj 2021, 12:47
Gjykata e Shkallës së Parë në Durrës ka liruar nga burgu Bexhet Zijajin, me detyrë përgjegjës teknik në fabrikën e tullave në Maminas, që u përfshi të premten (28 maj)nga flakët.
Si pasojë e zjarrit, mbeti i vdekur punëtori Besnik Bojaku.
Zijaji u arrestua të shtunën, ndërsa Gjykata ka caktuar masën e sigurisë “detyrim paraqitje”, ndërsa ai do të hetohet në gjendje të lirë për mos respektim të rregullave të mbrojtjes në punë.
Gjykata e ka arsyetuar vendimin për ta liruar Zijajin për shkak të gjendjes së tij shëndetësore, dhe faktin që nuk përbën rrezikshmëri për shoqërinë.
Fabrika e tullave u përfshi nga zjarri mesditën e së premtes, ndërsa hetimet paraprake kanë rezultuar se gjithçka ka nisur nga një shkëndije elektrike.
U deshën 7 automjete të zjarrëfikësve nga Durrësi, Shijaku dhe Tirana për të bërë të mundur fikjen e zjarrit që la një viktimë, dhe dëme të mëdha materiale.
