Me 31 maj mblidhet Konferenca Gjyqësore Kombëtare, zgjidhet anëtari i ri i KLD-së
Nga OraNews Përditësimi i fundit 10 Maj 2013, 15:47
Kryetari i Gjykatës së Lartë, Xhezair Zaganjori, me cilësinë e Kryetarit të Konferencës Gjyqësore Kombëtare (K.GJ.K.) dhe në mbështetje të Ligjit nr.77 datë 26.07.2012 “Për organizimin dhe funksionimin e Konferencës Gjyqësore Kombëtare”, neni 13/b, do të thërrasë mbledhjen e Konferencës Gjyqësore Kombëtare, e cila do të organizohet në Tiranë në datën 31.05.2013.Gjatë punimeve të kësaj konference do të votohet për zgjedhjen e anëtarit të ri të Këshillit të Lartë të Drejtësisë nga gjykatat e apelit, pas lënies vakant të këtij posti, nga emërimi i Artan Brocit si anëtar i Gjykatës së Lartë.Përsa më sipër sqarojmë se, bazuar në vendimin e datës 03.05.2013 të Këshillit të Lartë të Drejtësisë, mandati i Z. Broci në K.L.D, i përket anëtarit të Gjykatës së Lartë, në bazë të nenit 9, pika 2 të Ligjit “Për organizimin dhe funksionimin e Konferencës Gjyqësore Kombëtare”.Gjithashtu, anëtarët e konferences do të diskutojnë çështje të cilat kanë interes të veçantë për trajtim, mbi prioritetet dhe problematikat e gjyqësorit shqiptar.
