Zgjedhjet në Maqedoni, ndërkombëtarët apel për proces të rregullt
Nga OraNews Përditësimi i fundit 24 Mars 2013, 10:03
Pas apelit të djeshëm të presidentit George Ivanov, për një atmosferë korrekte dhe demokratike në zgjedhjet lokale, mesazhe për përgjegjësi dhe demokraci drejtuan edhe disa diplomatë të huaj në Maqedoni . Ata iu bënë thirrje votuesve dhe politikanëve për sjellje korrekte, si dhe kujtuan se ecuria e zgjedhjeve do të jetë shumë e rëndësishme për përshtypjen demokratikë që do të lërë Maqedonia në sytë e Europës."Këto zgjedhje, mes të tjerash, janë shumë të rëndësishme sepse reflektojnë gatishmërinë demokratike të vendit tuaj për të aderuar në Bashkimin Evropian. Shpresoj se këtë vit do të arrihet përparim i mëtejshëm në këtë drejtim", tha Gudrun Shtajnaker, Ambasadore e Gjermanisë."Iu bëj thirrje qytetarëve që të shprehin lirisht qëndrimin e tyre në zgjedhje. Iu bëj thirrje të gjitha palëve të përfshira në proces, që t'iu mundësojnë qytetarëve votim të lirë dhe fshehtësi të garantuar", deklaroi Mariet Shurman, Ambasadore e Holandës."Do të doja të theksoja rëndësinë e zgjedhjeve të qeta dhe të realizuara në mënyrë profesionale. Shpresoj, dhe kjo është edhe shpresa e Mbretërisë së Bashkuar, se zgjedhjet lokale do të jenë një burim i krenarisë dhe kënaqësisë së qytetarëve të Maqedonisë", u shpreh Kristopher Ivon, Ambasador i Britanisë së Madhe.Zgjedhjet lokale do të mbahen në 80 komuna dhe në Qytetin e Shkupit. Janë paraqitur 350 lista për kryetarë komunash dhe 480 lista për këshilltarë. Në 2 976 vendvotime, votën e tyre sipas listës zgjedhore do tya japin 1 743 403 qytetar. Procesin zgjedhor do ta vëzhgojnë 410 vëzhgues të huaj dhe 8400 vendor.
