Haga e kërkon, Sheshel: Nuk kam ndërmend të kthehem në burg
Nga OraNews Përditësimi i fundit 30 Mars 2015, 20:42
Ultranacionalisti serb,Vojisllav Sheshel, nuk ka ndërmend të kthehet në Hagë ku pritet të gjykohet për krime lufte.Pas urdhrit të lëshuar të hënën nga Gjykata Ndërkombëtare e Krimeve, lideri i radikalëve serbë konfirmoi deklaratat e bërë që ditën e parë që rishkeli në Serbi, duke pretenduar se urdhri i Hagës erdhi me kërkesë nga Beogradi."Siç e kam thënë dhe më parë, nuk kam ndërmend të kthehem me vullnet të lirë në burg. Nuk dua t'ja di për vendimin e tyre. Se çfarë do të ndodhë që tani e tutje është në dorë të regjimit serb, Nikoliçit dhe Vuçiçit. Por mendoj që kërkesa për rikthimin tim atje është bërë prej tyre, sepse e ndjejnë forcën e radikalëve serbë dhe ndihen të kërcënuar".Por edhe pse akuzon krerët e shtetit, reagimi zyrtar i Serbisë tregon se vendi është i pakënaqur me urdhrin e Hagës.Ministri i Jashtëm, Ivica Daçiç, tha se vendimi ishte dashakeq dha skandaloz, që vë në rrezik stabilitetin e Serbisë dhe gjithë rajonit.Ndërsa Ministri i Punës, Aleksandër Vulin, tha se ai është dhënë për të rrëzuar qeverinë e Vuçiçit, pasi ai ishte i pari kryeministër i Serbisë që përmendi fjalën agresion gjatë fjalimit në ceremoninë e përkujtimit të sulmeve të NATO-s ndaj Serbisë, 16 vjet më parë.Gjykata e Hagës, aprovoi kërkesën e prokurorëve për të shfuqizuar lejen e përkohshme të Shesheljit, e cila iu dha për probleme shëndetësore nëntorin e kaluar.Dorëzimi i tij ndaj autoriteteve ndërkombëtare pritet të vërë në provë qeverinë e Vuçiç, që kërkon të afrohet më shumë me Perëndimin, por njëkohësisht mban qendrim radikal ndaj pavarësisë së Kosovës dhe ruan lidhje të forta diplomatike dhe kulturore me Rusinë.
