Nesër protesta, Policia: Kontrolle dhe për persona që mund të lëvizin me armë
Nga OraNews Përditësimi i fundit 11 Mars 2015, 14:02
Një ditë para protestës së thirrur nga Partia Demokratike, Policia e Shtetit njoftoi planin e masave për garantimin dhe mbarëvajtjen e saj.Në një deklaratë për mediat, zv.drejtori i Policisë së Shtetit, Altin Qato paralajmëroi kontrolle personash dhe mjedisesh, me qëllim identifikimin dhe kapjen e personave që mund të lëvizin me armë apo sende të tjera të kundraligjshme.“Policia e Shtetit, do të marrë të gjitha masat e nevojshme “për garantimin dhe mbarëvajtjen e protestës” së lajmëruar nga Partia Demokratike, për ditën e enjte, 12 mars. E drejta kushtetuese për të protestuar është e garantuar, ndaj Policia e Shtetit do të marrë masat maksimale për garantimin e rendit dhe sigurisë publike në qytetin e Tiranës dhe në të gjithë vendin.Në këtë kontekst, Policia e Shtetit kërkon mirëkuptimin e qytetarëve për bllokimin e disa akseve rrugore në Tiranë dhe njëherazi u kujton të gjithë qytetarëve detyrimin për të qënë të pajisur me dokument identifikimi gjatë lëvizjes së tyre si dhe për t’ia vënë në dispozicion punonjësve të Policisë së Shtetit kur të kërkohet.Në kuadër të këtyre masave, si dhe nga vlerësimi i disa informacioneve të marra nga Policia e Shtetit dhe agjensi të tjera ligjzbatuese, strukturat e Policisë së Shtetit do të ushtrojnë kontrolle në të gjitha akset rrugore, kontrolle personash dhe mjedisesh, me qëllim identifikimin dhe kapjen e personave që mund të lëvizin me armë apo sende të tjera të kundraligjshme, apo që në bazë të të dhënave mund të synojnë akte të paligjshme gjatë zhvillimit të protestës”, bëri të ditur Qato.Qato shtoi më tej se Policia e Shtetit mbetet e vendosur për parandalimin e çdo paligjshmërie dhe garantimin e plotë të të drejtës për të protestuar paqësisht.Në këtë kontekst, Qato kërkoi mirëkuptimin e qytetarëve për prezencën e shtuar të kontrolleve policore në të gjitha akset rrugore dhe mjediset publike.“Kërkojmë mirëkuptimin e qytetarëve për prezencën e shtuar të kontrolleve policore në të gjitha akset rrugore dhe mjediset publike, si dhe për masat e shtuara të sigurisë në të gjithë vendin, me qëllim garantimin e jetës dhe shëndetit të qytetarëve, përfshirë qytetarët që do marrin pjesë në tubim. Policia e Shtetit, është e vendosur në përmbushjen e misionit të saj për garantimin e rendit e të sigurisë publike, të lirive dhe të drejtave të qytetarëve, në respekt të plotë të ligjit, duke ofruar rend e siguri për të gjithë qytetarët e këtij vendi”.
