Të përndjekurit në Irak, kisha katolike: Besimtarë, bashkohuni në lutjet e 17 gushtit
Nga OraNews Përditësimi i fundit 12 Gusht 2014, 12:22
Mesha e së dielës së 17 gushtit në të gjitha kishat e vendit, do të jetë një ditë lutje për popullësinë civile, katolike, të Irakut të cilët po përndiqen nga ISIS.Kisha Katolike ka lëshuar një ftesë në drejtim të besimtarëve të bëhen pjesë e lutjeve për rikthimin e paqes, respektimit të të drejtave njerëzore dhe të drejtës së besimit.Sipas Kishës katolike, në 2014, nuk mund të tolerohet më vrasja e një personi për arsye të fesë.Pak ditë më parë Bashkësitë fetare në Shqipëri përmes Këshillit Ndërfetar dolën në një deklaratë të përbashkët duke dënuar krimet që po kryhen nga ISISnë Irak.Njëkohësisht, ata apelonin faktorin ndërkombëtar që të gjejë zgjidhjet e duhura në mënyrë që të ndalet ky fenomen.Komuniteti ka shprehur solidaritetin me të gjithë ata që vuajnë jo vetëm në Irak, por në të gjitha vatrat e konfliktit në Lindjen e Mesme. (Ftesa për një ditë lutje nga Kisha Katolike)
Deklarata e plotë e Këshillit Ndërfetar të Shqipërisë“Këshilli Ndërfetar i Shqipërisë dhe antarët e tij (Komuniteti Musliman i Shqipërisë, Kisha Orthodhokse Autoqefale e Shqipërisë, Kisha Katolike e Shqipërisë dhe Kryegjyshata Botërore Bektashiane) mbështetur dhe nga Vëllazëria Ungjillore e Shqipërisë, po ndjekin me shqetësim situatën që po ndodh këto ditë në Lindjen e Mesme, në mënyrë të veçantë përndjekjen kriminale që terroristët e ISIS në Irak po ushtrojnë ndaj popullsisë lokale të krishterë, madje edhe ndaj myslimanëve dhe minoriteteve të tjera, e në mënyrë mizore përndjekjen dhe dëbimin e detyruar me dhunë të të krishterëve irakenë dhe të irakenëve të feve të tjera prej vendit të tyre. Ne dënojmë me forcë akte të tilla kriminale që nuk kanë asgjë të përbashkët me parimet themelore të besimeve tona.Lusim Zotin i cili na ka krijuar të gjithëve që t’u kthejë paqen dhe dinjitetin atyre zonave. Në emër të Zotit kërkojmë të ulen armët e të kërkohet paqe dhe bashkëjetesë. I bëjmë gjithashtu apel Faktorit Ndërkombëtar që të gjejë zgjidhjet e duhura në mënyrë që të ndalet fenomeni i largimit dhe i shpërnguljes me dhunë të banorëve të Mosulit dhe të rrethinave për shkak të besimit të tyre.Ne besojmë ngultësisht se e drejta e besimit është një e drejtë themelore e njeriut. Ne i gëzohemi kësaj të drejte në Shqipëri dhe një realiteti që besimet fetare kanë ndërtuar e vazhdojnë të ndërtojnë me shumë mund në vendin tonë. Duam t’u themi të gjithëve se është e mundur të jetojmë bashkë, duke ndihmuar njëri-tjetrin e duke respektuar njëri-tjetrin pavarësisht besimit, etnisë apo racës. Ndërkohë shprehim solidaritetin tonë me të gjithë ata që vuajnë jo vetëm në Irak, por në të gjitha vatrat e konfliktit në Lindjen e Mesme e u sigurojmë atyre lutjen dhë afërsinë tonë shpirtërore. Paqja e Zotit qoftë me ju!Të parët për lajmin e fundit. Ndiqni Oranews.tv në Facebook dhe në Twitter
