Turistët nga Kosova zgjedhin Shëngjinin, pastërti dhe çmime të lira
Nga OraNews Përditësimi i fundit 30 Korrik 2014, 08:55
Shëngjini është një nga destinacionet turistike më të frekuentuara nga turistët kosovarë. Jo vetëm për afërsinë gjeografike, por mbi të gjitha bukuria që ofron ky plazh dhe çmimet e përballueshme, janë arsyet kryesore pse shumica e turistëve e kanë kthyer në një traditë ardhjen me pushime në Shëngjin.Bajram Shalaj, jeton në Zvicër prej vitesh, dhe pothuajse çdo verë vjen t’i kalojë pushimet në Shëngjin së bashku me familjen e tij. Ai thotë se në krahasim me vite më parë Shëngjini po përmirësohet çdo vit e më shumë, si përsa i përket pastërtisë së plazhit ashtu edhe shërbimeve dhe çmimeve që ofrohen për turistët.Nga eksperienca e tij krahasuar me vende të tjera, siç është për shembull Ulqini, çmimet këtu në Shëngjin janë 50 % më lirë. Bajrami ka vendosur që mos e ndërrojë Shëngjinin me plazhe të tjera.Preng Kola prej 25 vitesh jeton në Gjermani. Ka mbetur i kënaqur nga pushimet që ka kaluar në Shëngjin, madje thotë se nuk e ndërron as me Kroacinë dhe as më Italinë.Edhe Dritan Gashi një i ri nga Kosova ka ardhur në Shëngjin me familjen për të qëndruar së bashku disa ditë, thotë se i pëlqen shumë plazhi i Shëngjinit, dhe është hera e dytë që kthehet këtu për të kaluar pushimet. I pëlqen edhe jugu i Shqipërisë por veçse është pak larg.Edhe dy pushuese të tjera vajza, thonë se u pëlqen Shëngjini, është i qetë, i pastër, dhe të tërheq të vish çdo verë.Fundi i muajit korrik dhe muaji gusht është ajo periudhë e sezonit veror që numëron edhe numrin më të madh të turistëve vendas dhe të huaj që zgjedhin plazhet shqiptare për të kaluar pushimet e verës. Tashmë edhe më mbarimin e muajit të Ramazanit, pritet një fluks edhe më i madh turistësh nga Kosova drejt Shqipërisë.Marrë nga Kosovapress
