Tribunali, pritet të arrestohen 120 persona për 320 serbë të zhdukur
Nga OraNews Përditësimi i fundit 14 Prill 2014, 18:12
Prokurori Clint Williamson duket se ka një dosje të trashë në tavolinë, të cilën pritet t’ua dorëzojë gjyqtarëve të Gjykatës së Posaçme (Tribunalit), që do të hetojë pohimet e Senatorit zviceran, Dick Marty.Burime të Gazetës Express thonë se në dosjen e Prokurorit amerikan gjenden emrat e rreth 120 udhëheqësve të luftës së UÇK-së, të cilët pritet të jenë të akuzuar për zhdukjen e rreth 320 serbëve nga rajoni i Rahovecit dhe ai i Dukagjinit.Të gjithë të dyshuarit, sipas burimeve të gazetës, pritet të arrestohen në momentin kur të plotësohet infrastruktura ligjore për krijimin e Gjykatës Posaçme (Tribunalit).Express e ka parë këtë dosje dhe shumica nga emrat e përmendur aty janë drejtues të njohur të luftës nga rajoni i Dukagjinit dhe Drenicës, por vlen të theksohet se aty ka edhe emra të njerëzve që kanë vepruar kryesisht në pjesën Veriore të Shqipërisë, në afërsi të kufirit me Kosovën.Në këtë dosje, sipas gazetës nuk figuron emri i kryeministrit Hashim Thaçi, megjithëse ai është përmendur në raportin e Dick Martyt.Megjithëse hetimet nisën me dyshimet e para për trafikim me organet njerëzore, akuza ndërkombëtare ndaj udhëheqësve të luftës së UÇK-së ka devijuar në zhdukjen e rreth 320 civilëve serbë.Më 22 prill Parlamenti i Kosovës voton për Gjykatën e VeçantëNjë letërkëmbim ndërmjet institucioneve të Kosovës dhe Bashkimit Evropian, për vazhdimin e mandatit të misionit të EULEX-it dhe krijimin e një Gjykate të posaçme, që do të hetojë gjetjet e një raporti të Këshillit të Evropës të publikuara në vitin 2010, pritet të përmbyllet të martën me përgjigjen që duhet t’i kthejë letrës ftesë së Presidentes së Kosovës, Atifete Jahjaga, shefja e politikës së jashtme të BE-së, Catherine Ashton.Letërkëmbimi do të hap rrugën që Parlamenti i Kosovës ta diskutojë dhe ta votojë atë në një pako ligjesh që do t’u dorëzohen deputetëve, nga qeveria e Kosovës.Letra e zonjës Ashton, me të cilën pranohet kërkesa e Institucioneve të vendit për vazhdimin e mandatit të EULEX-it dhe krijimin e gjykatës së posaçme, thonë zyrtarë qeveritarë, do të dorëzohet nga zyra e Presidentes në qeverinë e Kosovës, e cila do ta paraqes në Parlament si ligj të veçantë për të cilin do të deklarohen deputetët.Megjithëse faktori ndërkombëtar në Kosovë ka kërkuar që letërkëmbimi të dorëzohet gjatë kësaj jave, zyrtarë të qeverisë së Kosovës thonë se ka shumë më shumë mundësi që Parlamenti do të mund ta votojë pakon e ligjeve së bashku me letrat, të martën e ardhshme më 22 prill, në një seancë të jashtëzakonshme. Kjo edhe për faktin se qeveria duhet të përgatis propozimet për ndryshime të një numri ligjesh që ndërlidhen me mandatin e EULEX-it, që do të kërkojnë kohë për analizim nga ana e deputetëve.Kryesia e Parlamentit la të hapur mundësinë që çështja të hidhet për miratim kurdo që deputetëve u dorëzohen materialet e punës, varësisht nga procesi i këmbimit të letrave ndërmjet presidentes së Kosovës Atifete Jahjaga dhe shefes së politikës së jashtme të Bashkimit Evropian Catherine Ashton.Ndonëse, nuk shihet me sy të mirë nga asnjë forcë politike në Kosovë, miratimi i saj pritet të ndodhë në Parlamentin e Kosovës, për të shmangur themelimin e saj nga Këshilli i Sigurimit i Kombeve të Bashkuara.Miratimi në Parlament do të hapte ndërkaq mundësinë qe shumë shpejt grupet parlamentare të përgatisin edhe kushtet për shpërbërjen e Parlamentit për të çuar vendin në zgjedhje parlamentare, me gjasë nga fundi i muajit maj ose në pjesën e parë të qershorit.
