Takimi i BERZH-it, Rama: Shqipëria mundësi të shumta për investime

Nga OraNews Përditësimi i fundit 24 Shkurt 2014, 11:28

Banka Evropiane për Rindërtim dhe Zhvillim organizon sot një takim të nivelit të lartë me temë  “Investimi në Ballkanin Perëndimor”, ku do të marrin pjesë kryeministra, përfaqësues politikë e sipërmarrës kryesorë të shumë vendeve.Në takimin e nivelit të lartë të BERZH-it ka mbajtur një fjalim edhe kryeministri i Shqipërisë Edi Rama i cili ka theksuar se qeveria shqiptare do të bëjë gjithçka për të përmbushur të gjitha kriteret që kërkohen për integrimin. Sipas tij, integrimi i Shqipërisë në Bashkimin Evropian është një synim në planin afatmesëm i vendit tonë.Gjithashtu kryeministri Rama u shpreh se kriza ekonomike tregoi se ka ikur koha e modeleve të vjetra."Ne përballemi me vështirësi të mëdha ekonomike në fazën e një tranzicioni të gjatë. Rajoni ynë përballet me efektet e krizës, por edhe me të njëjta sfida që kemi patur më herët. Nga kriza ka ardhur një mesazh shumë i rëndësishëm, me të cilin jemi përballur edhe ne në Shqipëri. Mesazhi për Shqipërinë është se ditët me modele të vjetra ekonomike tashmë kanë ikur. Në Shqipëri do të kryhet një reformë e thellë fiskale që korrupsioni të mos ketë lidhje me administratën tatimore dhe e njëjta gjë do të kryhet edhe me financat publike që taksat e takspaguesve të shkojnë në drejtimin e duhur" tha Rama.Ai shtoi se zhvillimi i infrastrukturës do të jetë një nga prioritetet e qeverisë shqiptare për ta sjellë atë në standartet europiane.Kryeministri Rama gjithashtu i bëri thirrje investitorëve të huaj të vijnë të investojnë në Shqipëri duke u premtuar atyre se do të gjejnë tek qeveria një partnere të denjë për të zhvilluar biznesin e tyre."Shqipëria do ketë një model të ri të thithjes së investimeve të huaja, nuk do të ndiqen më praktikat e kaluara. Komuniteti ndërkombëtar i biznesit të vijë në Shqipëri” tha Rama duke shtuar se klima e biznesit ka nevojë për vëmendje të veçantë.Ndërsa Kryeministri i Kosovës Hashim Thaçi ndërsa vlerësoi mbështetjen që BERZH po i jep Kosovës dhe rajonit theksoi se në Kosovë po rriten investimet publike dhe po ndërtohet një sistem të tregut të lirë.Qëllimi i forumit është që të nxjerrë në pah investimet e mundshme dhe mundësitë e të bërit biznes në rajon dhe për të nxitur investimet dhe projektet direkte.Konferenca ofron një mundësi unike për shkëmbimin e pikëpamjeve për të kapërcyer hendekun midis angazhimit politik dhe projekteve reale rajonale .