Zaganjori pret delegacionin nga Kosova, bashkëpunim për një gjyqësor të pavarur
Nga OraNews Përditësimi i fundit 21 Shkurt 2014, 13:19
Kryetari i Gjykatës së Lartë të Republikës së Shqipërisë, Xhezair Zaganjori, si dhe anëtarë të tjerë të kësaj gjykate, kanë pritur një delegacion të nivelit të lartë të Këshillit Gjyqësor të Kosovës kryesuar nga Kryetari i këtij Këshilli, Enver Peci.Kryetari i Gjykatës së Lartë Z. Zaganjori, shprehu interesimin e tij dhe trupës gjyqësore mbi situatën dhe organizimin e pushtetit gjyqësor në Kosovë, duke u shprehur gjithashtu se gjyqësori shqiptar do të jetë gjithmonë i gatshëm për të bashkëpunuar me koleget e mbi të gjitha për mbrojtjen e pavarësisë së gjyqtarëvë dhe mirëfunksionimin e sistemeve respektive në Shqipëri e Kosovë.Zaganjori, bëri një përshkrim të detajuar të sistemit gjyqësor në vendin tonë duke i njohur miqtë nga Kosova, me mënyrën e funksionimit të pushtetit gjyqësor në Shqipëri dhe të Gjykatës së Lartë në veçanti, veçanërisht pas ndryshimeve të fundit ligjore dhe krijimit të Kolegjit Administrativ.Sipas tij, të dy vendet ndajnë problematika të përbashkëta sa i takon forcimit të shtetit dhe demokracive respektive si dhe bashkëpunimit ndërsinstitucional me qëllim gantanimin e një procesi të rregullt e të shpejtë gjyqësor në shërbim të qytetarit, në kuadër të përmbushjes së kritereve për t’u bërë pjesë e Bashkimit Evropian.Anëtarët e Gjykatës së Lartë kanë bashkëbiseduar me anëtarët e delegacionit kosovar në lidhje me disa nga problematikat kryesore me të cilat përballet sot sistemi gjyqësor në vendin tonë, duke i ftuar kolegët nga Kosova të jenë të hapur për bashkëpunim. Gjatë bashkëbisedimit, u evidentuan gjithashtu sfidat e përbashkëta në kuadër të përmbushjes së objektivave që secili shtet mbart në vetvete në fushën e drejtësisë dhe gjyqësorit.Kryetari i Këshillit Gjyqësor të Kosovës Peçi, theksoi rëndësinë e shkëmbimit të vizitave të tilla, të cilat nuk duhet të jenë vetëm të nivelit zyrtar por dhe mbajtjen e kontakteve të vazhdueshme në shërbim të rritjes së bashkëpunimit mes Shqipërisë dhe Kosovës.Gjithashtu Peçi, bëri një përshkrim të funksionimit të institucionit që ai drejton si dhe të sistemit të drejtësisë dhe gjyqësorit në Kosovë, duke hedhur mbi tryezë ide e probleme të përbashkëta për tu diskutuar.Delegacioni kosovar, i përbërë dhe nga Muharrem Shala, Salih Mekaj, Valdete Daka, Malcolm Simmons, Nebojsa Boricic, Rajma Elezi, Asllan Krasniqi, dhe Agim Maliqi, është shoqëruar edhe në ambientet e Gjykatës së Lartë ku zhvillohen proçeset gjyqësore.Këshilli Gjyqësor i Kosovës do të ketë takime me përfaqësuesit më të lartë të institucioneve të rëndësishme të Republikës së Shqipërisë, takime në të cilat do të diskutohen tema dhe shkëmbehen eksperienca nga palët gjatë ushtrimit të veprimtarisë së tyre.
