PD: Rama largon oficerin, mbrojti flamurin në protestën e 21 janarit
Nga OraNews Përditësimi i fundit 27 Nëntor 2013, 17:22
Partia Demokratike edhe gjatë ditës së sotme ka denoncuar shkarkimet e tjera që vijojnë tashmë në radhët e policisë së shtetit. Zëdhënësja e selisë blu, Laura Vorpsi, në një konferencë për mediat ka deklaruar se Kryeministri Rama ka shkarkuar nga detyra oficerin që ka mbrojtur flamurin në protestën e 21 janarit, duke e kaluar atë në roje objektesh. Ndërkohë shkarkimi i tij është bërë pa asnjë motivacion sipas PD.“Drejtuesit e rinj të Policisë kanë përmbushur sot një ëndërr të vjetër të Kryeministrit Rama dhe Ministrit Tahiri, që është denigrimi i Amaraldo Yzeirit, një oficeri model të Shtetit shqiptar.Të gjithë e kanë parë se si Amaraldo Yzeiri mbrojti flamurin tonë kombëtar në sulmin e dhunshëm të Partisë Socialiste me 21 janar të vitit 2011, dhe gjesti i tij u bë burim frymëzimi për gjithë shëqiptarët, për këdo që i bën nderin e merituar simbolit tonë kombëtar.Por kryeministri Rama, ai që përdhosi dy vite më parë flamurin tonë, nuk mund të mos hakmerrej ndaj oficerit model. Sot Amaraldo ka marrë në dorë një vendim që e largon atë nga trupa e operacioneve speciale.Pa asnjë motivacion, ai është lënë roje objektesh. Partia Demokratike e denoncon këtë rast si një hakmarrje personale të Edi Ramës dhe Saimir Tahirit, ndaj një oficeri që mbrojti nderin kombëtar, por që nxorri në shesh aktin e shëmtuar të këtij kryeministri, i cili shkeli dhe dhunoi institucionet dhe Flamurin tonë Kombëtar. Akti guximtar i Amarildos e bëri dhunën e Edi Ramës dhe të tijve të dukej edhe më e shëmtuar në sytë e gjithë botës.Akti heroik i Amaraldos e nxorri Edi Ramën një burracak që është gati të grisë e të ndotë Flamurin tonë për ambicien e tij.Dhe ky është i vetmi motiv i vërtetë i largimit nga detyra të oficerit Amaraldo Yzeiri” tha Vorpsi.
