Protestë kundër shkatërrimit të armëve siriane në Shqipëri
Nga OraNews Përditësimi i fundit 7 Nëntor 2013, 14:23
Qindra qytetarë të Tiranës,aktivistë të shqoërisë civile në një protestë para Kryeministrisë dhe kryesisë së Parlamentit kanë kërkuar nga qeveria që të mos heshtë më për shkatërrimin e armëve kimike të Sirisë, të cilat mund të shkatërrohen në vendin tonë.
Sazan Guri, ambjentalisti i njohur tha se ky është pushtim mjedisor që i bëhet Shqipërisë dhe është më i rrezikshmi nga të gjithë.
" Jemi kundër shkatërrimit të armëve kimike në Shqipëri. Shëndeti i familjeve është i rëndësishëm. Shqipëria nuk është kosh plehrash i Europës.Të bëjnë kujdes në atë që duhet ardhja e armëve kimike. Ne si qytetarë shqiptarë do i themi: Ose shporru ti armë kimike, ose shporru ti deputet apo politikan që kërkon të importosh këto armë!", tha ambientalisti Sazan Guri.
Për analistin e njohur në vend, Mustafa Nano, logjika e qeverisë dhe heshtja e saj në këtë rast nuk shkon me vendimin e saj kundër importimit të plehrave.
“Përpara zgjedhjeve, opozita e atëhershme që sot është mazhorancë, ngriti zërin kundër importit të mbetjeve, dhe është logjikë e çmendur të na kërkojnë të pranojmë mbetje kimike. Ne kemi mundësinë të vemë logjikën në punë dhe një nga pyetjet me elementare është: Përse armët kimike duhet të asgjësohen në Shqipëri?”, tha Nano.
Shoqëria civile dhe qytetarët e thjeshtë pohuan se nëqoftese heshtja e qeverisë do të vazhdojë do të përshkallëzojnë protestat, për të kulmuar në 29 nëntor, ditën e çlirimit të Shqipërisë.
