“Flamuj Shqiptarë, Itinerar Historik 1912-2012”, PS simpozium në Durrës
Nga OraNews Përditësimi i fundit 26 Nëntor 2012, 20:31
Ekspozita “Flamuj Shqiptarë, Itinerar Historik 1912-2012”, e organizuar nga Partia Socialiste në kuadër të festimeve për jubileun e 100-vjetorit të Pavarësisë, e ka pasur stacionin e radhës në Durrës. Kreu i PS-së, Edi Rama e ka çelur ekspozitën në qytetin bregdetar duke falënderuar fillimisht autorët e kësaj ekspozite të veçantë në llojin e vet.“Falënderoj përzemërsisht edhe njëherë të dy Artanët, Lamen dhe Shkrelin që na dhanë mundësinë që të shëtisim në të gjitha trojet shqiptare për të çuar pamjet e rrugëtimit të magjishëm të flamurit shqiptar, i cili e nisi rrugën e tij në nëntorin e vitit 1912 dhe me ecurinë e një shekulli kaloi mes shumë peripecive”, është shprehur kryesocialisti. Sipas tij sot shqiptarët janë të bashkuar rreth flamurit të tyre më shumë se asnjëherë tjetër, sepse rreth flamurit të tyre sot ata janë të lirë që ta ngrenë flamurin e tyre kudo ku jetojnë, në Shqipëri, në Kosovë, në Maqedoni, në Preshevë, në Mal të Zi dhe kudo tjetër.Kreu i Partisë Socialiste është ndalur më tej në vlerësimin e rolit të luajtur nga patriotët durrsakë, të cilët me aktivitetin e tyre i hapën rrugë pavarësimit të datës 28. “Dua që nga ana tjetër ta vlerësoj rolin e veçantë historikë të këtij qytetit, të Durrësit në rrugën drejt pavarësisë, rolin historik të Don Nikoll Kaçorrit dhe të patriotëve durrsakë të cilët u bënë bashkë dhe me një akt jashtëzakonisht të rëndësishëm për kronikën e pavarësisë i hapën rrugë pavarësimit të datës 28, duke e çuar në vend porosinë e Ismail Qemalit për domosdoshmërinë që flamuri shqiptar të valëvitej kudo ku pretendimet e fqinjëve të veriut ishin kërcënuese pas zmbrapsjes së Turqisë”, ka theksuar Rama.Dhe më tej një falënderim vjen për organizatorët e ceremonive festive në qytetin bregdetar, bashkinë e Durrësit dhe kryetarin e saj Vangjush Dako: “Duke i vlerësuar sot këta patriotë durrsakë, duke e çmuar sot rolin në histori të Durrësit, duke u ndjerë posaçërisht krenar edhe unë vetë si pjesë padashje e kësaj historie por gjithashtu edhe si bartës i një trashëgimie fort të çmuar patriotike ashtu si dhe të gjithë durrsakët e tjerë dëshiroj ta filloj atje ku e nisa. Me një falënderim për Vangjushin, kryetarin e bashkisë i cili ka krijuar këtë hapësirë kaq të posaçme në sheshin qendror të qytetit, por ka krijuar një mundësi për qytetarët që në këtë galeri të mund të shohin dhe të shijojnë shfaqe të ndryshme të arteve pamore dhe të fotografisë”.Më pas të pranishmit kanë vizituar ekspozitën e cila është sa e rrallë në llojin e vet aq edhe interesante për nga vlerat historike që pasqyron. Ekspozita “Flamuj Shqiptarë, Itinerar Historik 1912-2012” përmbledh rreth 30 flamuj të ndryshëm nga 1912 deri në ditët tona, rreth 50 fotografi, 20 prej të cilave publikohen për herë të parë të të gjithë epokave. 10 prej tyre paraqiten për herë të parë me ngjyra sepse janë fotografi të vjetra dhe nëpërmjet programi kompjuterik janë sjellë me ngjyra, që bëjnë një impresion tërësisht të ri, që sheh të shkuarën tërësisht me një sy tjetër përmes tyre. Po ashtu në ekspozitë janë paraqitur dhe një grup i madh dokumentesh origjinalë që kanë lidhje me historinë e simboleve të shtetit shqiptar.
