Qeveria “presion” ndaj opozitës: Dialog pa kushte, ose votojmë aktin të enjten
Nga OraNews Përditësimi i fundit 14 Tetor 2013, 13:35
Qeveria ka ripërsëritur sot ftesën për dialog pa kushte me opozitën për ligjin për nëpunësin civil, në të kundërtën do të vërë në lëvizje shumicën e cilësuar, votat e të cilës i kanë në Kuvend.Ministrja e Inovacionit Milena Harito është shprehur në një konferencë për shtyp se qeveria është e gatshme të dialogojë me opozitën pa i vënë kushte asaj por pret të njëjtën qëndrim prej saj.“Nëse opozita mendon që ligji është i zbatueshëm të na thotë në tryezë argumentet e veta. Të vijë e të dëgjojë argumentet tona, ky është dialogu, por nëse opozita mendon se është aty vetëm për të thënë jo, ne themi që kemi shumicën konsensusale dhe do e vëmë në lëvizje, deri të enjten ka kohë, le të dialogojmë pa kushte, ne nuk vëmë kushte edhe opozita të mos vërë kushte. Pa dialog asgjë s`ka për të ndryshuar. Jam këtu për të rikonfirmuar vullnetin e qeverisë dhe të kryeministrit për të mbajtur një tryezë me opozitën përpara së enjtes në të kundërt do të na duhet ta votojmë aktin normativ me 84 vota siç e parashikon Kushtetuta” tha Harito.
