Burgbacher: Gjermania kërkon te Shqipëria një partner bashkëpunimi në të njëjtin nivel
Nga OraNews Përditësimi i fundit 4 Tetor 2013, 20:08
"Ne kërkojmë të dalim nga statusi i vendit donator dhe të gjejmë te Shqipëria një partner bashkëpunimi në të njëjtin nivel". Kështu ka deklaruar në një intervistë për DW, Ernst Burgbacher, sekretar parlamentar i shtetit në Ministrinë gjermane të Ekonomisë. Sipas tij sektorët bashkëpunimit janë të shumtë, por fokusi kryesor mbetet energjia.“Sektorët e bashkëpunimit janë të shumtë, një pjesë prej të cilëvë unë kam pasur rast këto ditë t'i vizitoj personalisht si për shembull Aeroportin Ndërkombëtar “Nënë Tereza”, Portin Detar të Durrësit, Tirana Business Park, që menaxhohet nga Lindner Group etj., të cilat janë ndër shumë projekte që dëshmojnë për një bashkëpunimin të mirë mes dy vendeve.Gjithashtu dua të përmend dhe angazhimin në një projekt shumë të rëndësishëm, siç është ai TAP, në sektorët e ujësjellës kanalizimeve, të menaxhimit të mbetjeve, të energjisë etj. Tek energjia do të theksoj faktin se Gjermania është ndër vendet më të zhvilluara të botës nga pikëpamja teknologjike, që me siguri e favorizon bashkëpunimin tonë” shprehet ai.Burgbacher konstaton se sipërmarrësit gjermanë janë pozitivë dhe kanë interes për të investuar në Shqipëri. E teksa gjendet për një vizitë në Shqipëri, ai premton se me vete do të marrë mesazhin kryesor, atë të dinamikës së lartë të politikës së brendshme shqiptare, por dhe gatishmërisë që ekziston këtu për të intesifikuar dhe zgjeruar më shumë bashkëpunimin me Gjermaninë.“Më lejoni t'ju them se kemi marrë në duar rezultatet e një anketimi me sipërmarrësit gjermanë në Shqipëri. Kur ata janë pyetur së a do ta rimerrnin edhe njëherë vendimin për të qenë aktivë dhe për të investuar në Shqipëri, ata janë përgjigjur “po”. Nga kontaktet me delegacionin e biznesmenëve kam vërejtur interesim të tyre gjë që është pozitive. Rëndësi ka dhe bashkëpunimi rajonal. Tregu shqiptar është i vogël dhe investitorët e huaj, përfshi ata gjermanë janë për një hapësirë më të madhe tregu. Ndaj dhe kooperimi rajonal jep efekte konkrete dhe shumë të rëndësishme në këtë kontekst. Në kthimin tim në Gjermani unë do të marr me vete mesazhin kryesor, atë të dinamikës së lartë të politikës së brendshme shqiptare, por dhe gatishmërisë që ekziston këtu për të intesifikuar dhe zgjeruar më shumë bashkëpunimin me Gjermaninë. Vitin e ardhshëm në Gjermani do të mbahet një konference ekonomike e të dy vendeve, ku pritet që të marrin pjesë më shumë se 100 përfaqësues nga biznesi gjerman në sektorë të ndryshëm. Sigurisht kanë ekzistuar probleme për ndërtimin e linjës së interkonjeksionit Shqipëri –Kosovë, por gjatë bisedës me kryeministrin kemi folur hapur rreth kësaj tematike dhe na u sigurua për zgjidhje të problemit. Mendoj se jemi në një rrugë të mbarë zgjidhjeje” thekson sekretari parlamentar i shtetit në Ministrinë gjermane të Ekonomisë.I pyetur nëse është gjetur një zgjidhje lidhur me pakënaqësitë e palës gjermane për faktin që për asistencën e dhënë për Shqipërinë kërkohen që të paguhen edhe taksa doganore, tatime apo tarifa të tjera, kur kjo shkon në kundërshtim me marrëveshjet kontraktuale, ai u përgjigj:“Gjermania është donatori më i madh në vend përllogaritur për frymë popullate. Edhe ka pasur probleme në këtë kontekst, të cilat janë adresuar dhe trajtohen hapur. Kemi marrë sinjale që këto çështje do të zgjidhen në periudhën më të shkurtër të mundshme, që është dhe sinjal konkret për investitorët gjermanë në kushtet për të bërë biznes në Shqipëri. Ne kërkojmë që të dalim nga statusi i vendit donator, kërkojmë që të gjejmë te Shqipëria një partner bashkëpunimi në të njëjtin nivel. Mendoj se në këtë drejtim hap pas hapi do të mbërrijmë në rezultatet e dëshiruara. Po ti referohemi shifrave, në vitin 2010 kemi pasur një nivel të shkëmbimit tregëtar mes dy vendeve prej 110 milion eurosh. Ndërkohë që vetëm për 6 mujorin e parë të vitit, niveli është në kuotën 192 milion euro. Importi i mallrave shqiptare në Gjermani është më i madh krahasuar me eksportet nga Gjermania në drejtim të Shqipërisë. Kjo tregon mjaft mirë që Shqipëria po eksporton produktet e saj në Gjermani” përfundoi Burgbacher.
