Konflikti për dëmshpërblimet, banorët e “St.Trenit” takohen sot me Bashën
Nga OraNews Përditësimi i fundit 4 Tetor 2013, 08:15
Kryebashkiaku Lulzim Basha do të presë sot në zyrën e tij një përfaqësi të banorëve, shtëpitë e të cilëve preken nga ndërtimi i bulevardit të Tiranës.Një përfaqësi prej 12 kryefamiljarësh do të takohen sot në orën 13:00 me Bashën për t`i kërkuar vlerësim më të lartë të shtëpive të tyre.Gjatë një takimi ditën e djeshme me kryebashkiakun, ky i fundit është shprehur i gatshëm për të plotësuar të gjitha detyrimet e marra në takimin e zhvilluar një muaj më parë me një përfaqësi të banorëve.“Bashkia nuk e ndryshon dot ligjin, por Bashkia ka parë që çmimet janë të paarsyeshme. Bashkia ka parë se dikush që e ka pasur një shtëpi, me ato lekë nuk blen dot një shtëpi tjetër. Atëherë, Bashkia i ka thënë përfaqësuesve tuaj në takimin e zhvilluar para një muaji që jemi dakord të hyjmë në një marrëdhënie, ku me ndërmjetësimin e Bashkisë, për çdo banesë që duhet të prishet në kuadër të bulevardit, Bashkia të sigurojë një banesë për ata banorë dhe me banorët është rënë në parim dakord. Ne kemi hedhur hapat në këtë drejtim, se nuk është e lehtë as për ne. Ne nuk e bëjmë dot me lekë publike. Ne kemi kërkuar nga 70-80 familje që preken, cilat familje bien dakord, sa metra katrorë shtëpi lënë. Me përfaqësinë tuaj, ne kemi rënë dakord dhe jemi në pritje të informacionit nga ana juaj, emër e mbiemër, kryefamiljar të atyre që janë dakord me këtë propozim. Unë pres sërish, që brenda ditës së nesërme në orën 13.00, një përfaqësi prej 12 kryefamiljarësh, të sjellë vendimin final të banorëve, nëse doni të ecim në këtë rrugë, apo jo” është shprehur dje Basha.
