Dervishi: Plazhi publik në Vilë-Bashtovë mundësi më shumë për turistët dhe qytetarët
Nga Sonila Musai Përditësimi i fundit 19 Maj 2026, 20:50
Kryetari i Këshillit të Shoqatës së Restoranteve dhe Bujtinave, Kujtim Dervishi, i ftuar në emisionin “Epiqendër” të gazetares Sonila Musaj në Ora News, foli për krijimin e një hapësire publike në zonën bregdetare të Vilë-Bashtovë, e cila do të jetë në dispozicion të pushuesve gjatë sezonit turistik.
Sipas Dervishit, iniciativa është ndërmarrë me mbështetjen e prefektit të Tiranës dhe ka sjellë pastrimin e të gjithë zonës, duke krijuar kushte më të mira për vizitorët.
Dervishi theksoi se plazhi do të jetë i aksesueshëm për të gjithë qytetarët, pa tarifa shtesë për përdorimin e hapësirës.
Ai vlerësoi gjithashtu investimet në infrastrukturë, duke nënvizuar se rruga e asfaltuar deri pranë bregut të detit e ka bërë zonën më të aksesueshme për turistët dhe pushuesit vendas.
Sipas tij, krijimi i hapësirave publike dhe përmirësimi i infrastrukturës janë elementë të rëndësishëm për zhvillimin e turizmit dhe për ofrimin e alternativave më të aksesueshme për qytetarët gjatë sezonit veror.
