Iu kalua dosja për gjykim/ Ish-prokurori i Sarandës reagon: Publikimet në media krijuan idenë e fajësisë pa u shqyrtuar çështja
Nga Edison Vatnikaj Përditësimi i fundit 7 Maj 2026, 21:30
Ish-drejtuesi i Prokurorisë së Sarandës, Kledian Llaho, ka reaguar pas njoftimit të fundit për çështjen e tij, duke e cilësuar mënyrën e komunikimit publik si të padrejtë dhe dëmtuese për parimin e prezumimit të pafajësisë.
Ai thotë se publikimet në media krijojnë idenë e fajësisë përpara se çështja të shqyrtohet nga gjykata dhe se kjo, sipas tij, bie ndesh me standardet e Gjykatës Evropiane për të Drejtat e Njeriut.
Llaho përmend se procesi ndaj tij është shoqëruar me hapa të ndryshëm proceduralë, si masa e sigurisë, ngritja e akuzës dhe dërgimi i çështjes për gjykim, të cilat sipas tij janë paraqitur publikisht si zhvillime të mbyllura, duke ndikuar në opinionin publik.
Ai ngre gjithashtu shqetësime për konflikt interesi mes palëve të përfshira në proces, për mënyrën e mbledhjes së provave, si dhe për përdorimin e deklarimeve të personave që sipas tij kanë interesa të drejtpërdrejta në çështje.
Në reagim, Llaho shprehet se disa veprime hetimore dhe procedurale janë trajtuar si të paligjshme vetëm mbi bazën e pretendimeve të palëve të hetuara prej tij, duke e konsideruar këtë një situatë të pazakontë për sistemin e drejtësisë penale.
Ai shton se procesi gjyqësor pritet të tregojë, sipas tij, problematikat që kanë shoqëruar hetimet dhe kërkon që media dhe institucionet monitoruese të ndjekin çështjen me transparencë.
Llaho thekson se drejtësia nuk duhet të përdoret si mjet presioni apo hakmarrjeje, por duhet të mbetet e bazuar vetëm në prova dhe procedurë ligjore.
