Rama fushatë me pensionistët, “hap thesin” ditët e fundit të vitit, dalin shifrat e “Pakos” 8 miliardëshe
Nga OraNews Përditësimi i fundit 30 Dhjetor 2022, 09:03
Kur na ndajnë afro 5 muaj nga zgjedhjet vendore të 14 majit, mazhoranca shpreson tek vota e pensionistëve, aty ku është dhe elektorati më i madh.
Dhe në përpjekje për disa vota më shumë, kreu i qeverisë Edi Rama bën gati pakot për të gjithë pensionistët shqiptarë dhe shtresat në nevojë, të cilët do të marrin ndihmë nga shteti.
Përmes rrjeteve sociale, Rama ka njoftuar këtë premte se pensionistët do të marrin 8000 lekë (të reja) secili nga Pakoja e Madhe për të zbutur impaktin e inflacionit të luftës.
“Mirëmëngjes! Dhe me kënaqësinë e faktit se 695 mijë pensionistë do të marrin nga 8000Lekë (të reja) secili nga Pakoja e Madhe, ku do të kenë pjesën e tyre 1 milionë shqiptarë, që do të përfitojnë sipas kategorive deri në 20000Lekë (të reja), për të zbutur impaktin e inflacionit të luftës deri në fund të këtij dimri të vështirë për mbarë Europën, ju uroj një ditë të mbarë”, shprehet kreu i Qeverisë, Edi Rama.
