“Sytë” e qeverisë nga bastet sportive, Ibrahimaj: Brenda 3 muajve miratojmë ndryshimet ligjore

Nga OraNews Përditësimi i fundit 28 Dhjetor 2022, 10:29

Qeveria “Rama” nuk e largon vëmendjen nga bastet sportive, me të cilat do të merret që në ditët e para të vitit të ardhshëm.

Në konferencën e fundit për shtyp për 2022-in, ministrja e Financave Delina Ibrahimaj tha se në vitin 2023 do të nisin procedurat për ndryshimet ligjore lidhur me bastet sportive.

Sipas saj, brenda 3 mujorit të parë të vitit 2023 ky ligj pritet të miratohet në parlament.

“Ne kemi punuar intensivisht gjatë muajve të fundit me qëllim finalizimin e ndryshimeve ligjore në ligjin për lojërat e fatit. Me qëllim lejimin e basteve sportive online duke pasur shumë kujdes të ruajmë ato kritere e parametra që kanë qenë të përcaktuara.

Jemi në proces te finalizimit. Me nisjen e vitit të ri 2023, do nisim procedurat e miratimit të këtij ligji. Ne gjykimin tim, brenda 3 mujorit të parë të vitit 2023 ky ligj pritet të miratohet në parlament”, u shpreh ajo.